رسائل خاصة بس بدون زعل

اليوم عندي رسائل خاصة أحب أطرشها و خليها جذي بالعربي من غير لف ولا دوران و الزعل ممنوع و العتب مرفوع و الباب مخلوع و المواطن مصفوع والثوب مرقوع و الخط مقطوع.

وعشان الوقت ندخل في الرسايل بسرعة.

وزارة الداخلية:

الله يعطيكم العافية. ندري فيكم تحاولون قد اللي تقدرون عليه, باللي يسمحون لكم الجماعة من فوق.. بعد أن وكلنا أمرنا إلى الله عز وجل فا إحنا نعتمد عليكم  لحماية أرواحنا و أعراضنا و ممتلكاتنا. ولكن يا جماعة بلغ السيل الزبى و لا تزعلون إن شفتوا بعض المخربين يتساقطون بسبب الدهس – الغير متعمد طبعا. فنرجو منكم عدم إحتساب رسم الحوادث على الإخوان (16 دينار بحريني – حوالي 43 دولار) , وبعدين يكفى الناس تأخيرت بسبة سد الشوارع, فما في داعي للسين و الجيم ليه بعد إجازة العيد السعيد أعاده الله على منتسبي الداخلية بالخير و السلامة من الحرق و الضرب بالأسياخ و الطابوق.

إننا لم و لن نفقد الثقة في رجال لأمننا البواسل, إنهم يقومون بمهام صعبة و في ظروف أصعب و لهم كل التقدير.

تلفزيون البحرين:

الصراحة تفوقتوا على روحكم البارحة... غطيتوا الحدث الهام من كل الجوانب و من غير رتوش , عفيه عليكم... يعني مادري شلون الناس و على مر هالسنين ساكته على موضوع السيارات المعروضة للبيع في الشوارع... مسألة أمن قومي ذي ..نعم .. صوب برادة الأسرة في سار مادري مقابة في سيارات معروضة للبيع ...أنا شفتها بنفسي محد قال لي.. إذا تبون با حلف بعد... و كان المنظر فظيع .. حسيت إنه في عمل إرهابي قاعد يصير ... تصوروا كان في سيارة لكزس !! والله ...و مرسيدس بعد ... ويالك الموت يا تارك الصلاة ...كان فيه سيارتين كامري ... اليهال قاموا يصارخون... بس أشوه وصلنا ليه دوار جنوسان بالسلامه و كان في جماعة كاتين زيت عافية في الشارع و حصى و زبالة و تايرات تنحرق ... الحمد لله إطمئن اليهال .. و وسعوا صدرهم و راحت منهم الخوفة.. فمشكورين على هالبرنامج الشيق اللي ما يبط الجبد... و على الإخراج اللي ذكرني بالستينات بس لو كان أسود و أبيض  كان بيكون روعة الحقيقة ...يعني إخراج كلاسيكي.

الشكر موصول لسعادة النائب عدنان المالكي الذي لم يتوانى عن خدمة أبناء الشعب و تكلم عن طريق الهاتف إلى الشعب ولولا وجود هذه السيارات في الشوارع و ما يشكله من خطر أمني عليه لكان في الأستوديو مع الجماعة. وتدرون هو نائب و عنده حصانة... جم حصان يعطون كل نائب ؟ مادري ...مب مهم .. بس عندي سؤال لسعادة النائب – ما إستحيت من روحك البارحة و إنت تتكلم عن السيارات الواقفة و الديرة مشعلله والشوارع مقطعه ؟ ما حسيت بخجل؟

بالنسبة للمذيعة غير المتألقة أمينة – ندري زين مازين إن الكاميرا تخوف – بس يا عيوني إنتي كنتي مرعوبة كأن و العياذ بالله شفتي علي سلمان في المنام. و بعدين – شنو هالقميص اللي لابسته الله هداج ؟ شنو خليتي لشادية؟ هاي قميص ينلبس ؟ جنه رايحة حفلة زار ! لما دخل عليكم سعيد في ثواني لفكم إنتي و محمد و خلاكم في مخباه الصغير. تعلمي منه إذا بغيتي تواصلي في التلفزيون, بس نصيحة..... خلي شغل النهار لا تهدينه.

التجمع الوطني:

و الله يا جماعة إنتوا أكبر إحباط شافه الشارع السني من يوم ما وقفوا برنامج بابا ياسين. و اليوم الصبح أبي أشوف كلمة فشل بالإنجلينزي في قاموس وبستر , و الجماعة حاطين شعاركم وبس جدام الكلمة , لا تعريف ولاشي , يا ترى شنو قصدهم؟ التجمع كان أملنا , إحنا اللي سويناه و بقدرة قادرالأمانة العامة  صارت مجلس عائلي للإخوان و عيال العم. وفوق هاي كله في 17 عضو من أصل 25  هم من أفشل جمعية عرفها التاريخ – ألا وهي جمعية هز الوسط العربي. معقولة ؟ كلنا أهل الفاتح بكافة أطيافنا نختزل بهالطريقة؟ معقولة التجمع تصادر هلون؟ و قلنا أوكي, ماشي عيال العم و عيال الخال العود ما في مشكلة, عبدالله هاشم و العثمان و قلنا مسموحين , زلة لسان و راحت ... بس وين مواقفكم؟ معقولة هالقد هزيلة و متخبطة ...لا شوفوا عاد , رجعوا لنا التجمع و من ال 450 ألف بنحصل 25 يديرونه و ريحوا روحكم.

تحليل سياسي لمحشش:

رفيجي يحب (الصنف), و يحب يصير (هاي) يعني يطير فوق السحاب بعد ما يسحبله نفسين, يقول ترى فوق مافي شوارع مبنده و لا في زحمة , خوش مكان, طراوه . صاحبنا إسمه (دال), ترى إسمه جذي, إنزين و يقول عن أحداث التخريب مالت اليوم- عنبوهم ربطوا سلاسل بالعواميد ليش , خايفين العامود يشرد يعني ؟ وبعدين قاموا يكتون بيبي أويل في الشوارع , ما عندهم سالفة . شوف يبه – السالفة و ما فيها إنه كان في بوادر صفقة بين جماعة شادية و الحكومة, إنزين , و شادية وربعها خسروا كل شي ,فا سووا إجتماع البارحة في ذاك الفندق, إنزين , و قاموا يطبخون طبخة ... إييييه ... و من شم ريحته ؟ ها ... جماعة مشيمع... وقالوا حق ربعهم روحوا تحركوا و خربوا عليهم الإكله , شلون يطبخون و ما يعزمونه ؟ إنزين أبوي ... فا قاموا و عفسوا اللهي هست و اللي ما ميش.. جماعتنا عرفوا بالسالفه و هم بعد تحركوا و حرقوا التويتر و الحين شكلهم أجلوا الصفقة و يمكن لغوها بعد... إشرايكم؟؟

الوفاق :

ما شكلكم وايد مصختوها؟ صايرين مثل اليهال في الكي جي. مب محصلين لكم اللي يأدبكم. شوفوا عاد, صيروا آدميين و قولوا حق ربعكم في ناس يعرفون شلون يأدبوهم بس حزتها لا تقعدون تناقزون مثل القطاوة المختنه ! إيييه ترى حذرتكم و إنتو كيفكم. و إحنا يا علي يا سلمان ما نعرف نطق المنخل بالمقلوب و لا الطار يخش الشمس إييييه ... هممم تدرون ترى هالمثل شكله مو عدل ... الله يغربل إبليسك يا دال ...بس يا علي سلمان إنت تعرف هالمثل – إذا كان رب البيت بالدف ضارب , فشيمة أهل البيت الرقص ... و دوؤي يا مزيكا.

وفيه كلمه وصلوها لعيسى قاسم و لو إني أدري إنه هو عضو متابع عندي ويحب يقرا المدونة – يا عيسى ترى الجماعة يسمعونلك ...كلمتين منك ما تشوف واحد منهم يوطوط في الشارع , طبعا إذا كان ودك تحافظ على السلم الأهلي و أرواح الناس – أما إذا ما تبي فهاي موضوع ثاني.... عموما أقولك , إحنا بنحملك مسئولية أي نقطة دم تنزل و أي إصابة تصير ... إنت المسئول مو أحد ثاني .. الدم في رقبتك ليوم الدين ... و الحمل ثقيل.

الحكومة:

شدعوه ياجماعة, إحنا ربعكم , عيالكم , منكم و فيكم و إليكم ...ييييه تخشون علينا شغلات ؟ مايصير ..ما كنش العشم يا بو حكومة. تصارحوا معانا ترى و الله ما بنزعل منكم ...بس جذي إحنا ماخذين على خاطرنا منكم ...ما تقولون شصاير في الديرة ولا وين رايحين ولا من وين ييايين. أنا زعلان منكم و في علي مخالفة مرورية وما أبي أدفعها ...يعني زين جذي ؟ أشوف شلون بتعدلون ميزانيتكم الحين ...!؟

وبعدين ما تشوفون إنكم وايد صاكين على عيالنا في الداخلية؟ شفكيم عليهم ؟ خايفين من أحد ؟ إحنا ما نخاف إلا من رب العالمين وبس و بعدين, أنا وياكم ييياه ..لا تخافون ... طبقوا القانون.

DR. KNOW