ياتني شكاوي وايد
على رسايل 22 .. ناس قالت عورت القلب .. ناس قالت ثقيلة .. ناس قالت إني متحامل على
التميمي (ردينا عالتحاميل) .. وناس قالت إني طائفي .. وجذي إلى أخره ... اليوم .. قلت
باخلي السياسة تولي .. بنتكلم اليوم في مواضيع بعيدة عن السياسة .. وقلت باتكلم في
بعض الأمور الإجتماعية .. بعض الأمور اللي ما نتكلم فيها ... ليش عندنا أشياء صعب الكلام فيها مع إنها من المباحات !!؟؟ ليش نشوفها
بس ما نقدر نتكلم فيها .. ؟؟ ليش ...؟؟؟
حاولت أكتب رسالة تتعلق بإمورنا المعيشية و
الإجتماعية .. فقامت علي القيامة ... لإني تجرأت و كتبت في موضوع له جوانب شخصية
.. ما إستعملت ولا كلمة خارجة عن الأدب ... ولا إستخدمت كلمة ما نعرفها كلنا ...
كل الموضوع إني تكلمت .. عن الكوندومز ... الواقي الذكري .. بالعربي .. ما في
برادة و لاسوبر ماركت ولا صيدلية إلا و معروضين .. وكلنا نعرف شنو هو ..ولشنو
يستعمل ... فالسؤال .. ليش لما نتكلم عليه .. الكل يقوم يناقز ..؟ موضوعي ما كان
يتناوله إلا من ناحية الحرج اللي يصيب بعض الناس ...الرياييل خاصة ...المعنيين
بالأمر.. لما يروحون يشترونه ... و ذكرت قصة .. طبعا من الخيال .. وحطيته في حوار
مضحك ... عشان نفرفش شوي .. ما يصير نعيش حياتنا ندور في فلك علي سلمان و عصابته و
نكدهم.. و النواب و بلاويهم .. لا عندنا حياتنا نعيشها ..
اللي صار .. حبيت أخذ بعض الأراء من الأخوة
والأخوات ... قبل ما أنشر .. وهاي كانت غلطتي ..كان مفروض أنشر و بس ... وحدة قالت
OMG… .. OMG.... وعادتها ..و عادتها .. أبيييه ... إنزين ... بس عاد .. وحدة
قالت ... بتخسر كل البنات اللي يقرونلك ... أففففي... وحدة قالت ما بسويلك ريتويت
.. وحدة قالت بسويلك بلوك .. واحد قالي بتخسر كل الرياييل اللي يقرونلك ..!! حتى
الرياييل ...بل بل !! ومافي إلا واحد رفيجي .. من المحششين المحترفين .. قال
..ماقدرت أقوم من على ظهري من شدة الضحك ... لا.. لاتنشر ... ما بيفهمونك .. بس
بعدين رد وقال ... إنشر ييييياه ...
أنا سألت الجماعة ... هل إستخدمت كلمة سيئة
..؟؟ كلهم قالوا.. حشى .. هل إستانستوا و إنتوا تقرونه ...؟ كلهم قالوا إيه ...
أها ... هل فيه موضوع إجتماعي ...؟؟ قالوا ...أكيييد ... إنزين ... فإذن ...أقدر
أنشر ... كلهم قالوا ... لا !!.. المسألة إنه إحنا ما نقدر نواجه الواقع ... و لا
نقدر نتكلم بإمور جنسية .. أو أشياء نعتبرها خاصة .. إحنا تعودنا إن ندفن روسنا في
الرمل .. علي سلمان شافنا نخش راسنا في الرمل .. مانقدر نتكلم في أمور سياسية ..
وأعطاه الفرصة يظهر .. من شنو نخاف .. !!؟؟؟
شوفوا .. ما بنشرها إحتراما للأراء اللي
قالت لا .. أنا إنسان ديموقراطي ..مع إنهم صادروا حقي الديموقراطي في التعبير ...
بس مو مشكل .. اللي يحب يطلع عليها ... يطرشلي على الخاص.. أو يطلبها ...وبأرسلها
بالإيميل ... ولا تستحون ... وكل واحد يخلي باله على لغلوغه...
وردينا
للسياسية .. ماكو فايدة
إلى
علي سلمان –
أقولك ما لي شغل
إلا إنت .. أقولك يوز عني يا ويه القرقفانه و مافي فايدة ... لازم تنكد علي عيشتي
.. إفففففف ... من قبل الخطاب الملكي بليله و إنت عارف إنه ما بيعجبك .. قمت و
فريت ويهك .. و قلت على توتير .. إنه الخطاب إذا ما عطاكم اللي تبونه الأزمة بتصير
أسوأ.. يعني قاعد تهدد قبل ما تسمع .. وسمعت و إحنا سمعنا .. و أنا أسمع أقول
..علوي سلمان الحين قاعد يبيض .. و هاي اللي صار ..
اليوم .. شعنده
علاوي .. مسوي مؤتمر صحفي .. ياه ياه ياه .. عنده مشروع يصير ريال ... في البداية
.. بس المحاولة جيدة ... شقال هالبرنثة ..؟؟
أول شي قال ... إن الخطاب يذكره بخطاب مبارك و خطاب بن علي و خطاب القذافي .. ليش
تقولون ذكره بهالجماعة ..؟؟؟؟ أقوللكم .. حاول الثلاثة إنقاذ حكمهم بخطابات توعد
الشعب بحريات أكثر و إصلاحات .. وقصد علي سلمان إنه فات عليهم الفوت .. فما أنقذهم
الخطاب .. و هالهيس ... يصنف خطاب الملك وياهم ... لا ويقول هاي أسوأ خطاب فيهم
بعد .. .. يعني هاذيله إنتهوا ... و يعني
يا ملك ..إنت بعد في عداد المنتهين .. هاي من ناحية ... ومن ناحية ثانية ... بالغصب
يبي يدمج البحرين ضمن ثورات الربيع العربي.. أقول كلمة وحده في هذا الخصوص عشان ما
طول عليكم ........... طــــــــــــــــــل !
إنتقل نوره
سلمان إلى إن سقف العرض نزل عما قدمه ولي العهد ... خبركم في مارس أيام ما قدم
المبادىء السبعة .. وفي نفس الوقت ...و بخبث ..يحاول يسوي فتنة في الأسرة الحاكمة
فيقول .. معناته إنه كلام ولي العهد لا قيمة له ..!! إنزين ... أول شي .. تتذكر يا
علي يا سلمان حزة ياكم عرض المبادىء السبعة قعدت تدلل ..؟؟ و حطيت 12 شرط مب واحد
ولا إثنين يا أسود الويه ... ورفضت .. و ماخلوا أحد ما دزوا عليج .. عفوا عليك ..
تتذكر ..؟؟ يعني لاتلوم أحد إلا ثوارتك .. مادري ثورتك .. إنتوا اللي رفضتوا ..
لاتلوموا إلا روحكم .. وعن الربربة الزايدة عن ولي العهد و كلمته وروح إلحق ربعك
.. ولا بارد عليك..
بعدين يرد علوي
إلى النغمة القديمة .. الشعب يبي و الشعب ما يبي ... نغمة الحقيقة ملينا منها ..
إنت ليش ما تقول ربعي الشيعة الموالين لإيران يبون أو مايبون .. إنت شلون تتكلم
بإسم كل مواطن سني و شيعي شريف ما يوالي مخططاتكم ..؟؟؟ في اليوم اللي نبي أحد
يتكلم بإسمنا في عندنا رجال .. ما بننتظر طبال مخنث يتكلم بإسمنا .. هاي الحقيقة
.. ومابي أحد يحتج على الكلمة .. قلنالكم كلمة عربية فصحى .. حتى شيخنا إستخدمها
بخطبة الجمعة يوصفها فيها....
المهم ...
الزبدة .. كل ذي كان مقدمات عشان يهددنا بإنه ما راح يهدأ لا هو ولا عصابته ...
وبإن السلمية اللي عشناها على مدى سنة راح تستمر ... وربما تزيد .. و هني باقول
للحكومة كلمة ... إذا إنتوا مستعدين تستحملوا الوضع .. هاي شأنكم ... الصراحة ..
الصراحة ... الشعب مو مستعد .. والصراحة .. إذا ما إنتوا عارفين ... ترى في قاعد
يصير حراك .. و بياخذ الأوضاع لمزيد من التأزيم ... والبلد صغيرونه ... وما تستحمل
...و الملامة عليكم بالنص ويا علي سلمان ... جربتوا كل أنواع الجزر وياهم .. باقي
نوع واحد من العصى .... إستعملوها .... مشكلتكم إنتوا أعطيتوا علوي الجزر من
المكان الغلط ..و عجبته ... خوفي نفس الشي يصير بالعصاية بعد..
أقول للحكومة
... كفاية ... ترى صج كفاية... اللي قاعد يصير بالديرة ما أنزل الله به من سلطان
.. وما يجوز ... مسؤوليتكم إنكم إطبقون القانون ... وتوفير الأمن و الأمان ...
الداخلية بالمسموح لها ما قصرت.. بس .. الأشغال واقفة .. بيع مافي إلا للضروريات ..
فورميلا يا عالم فيه ولا مافيه .. صرنا تحت رحمة نبيل رجب ... معرض الطيران ..
ويهددون يسوون "حداد السماء" .. ما فهمته ذي .. يعني فيه حداددين عايشين
بالسما ...؟؟ ليكون بيسوون أسياخ هناك و يفلعون فيها الطيارات اللي في المعرض ..؟؟
و حداددين السما بعد ما يحتاي ... أسياخهم أسرع من إف 16 .. !! المهم ... أقول
للحكومة .. يإما تحدقون أو قطعوا الميدار ..
ياسر
الخبيث –
شاقول عن هذا
السافل الحقير ..؟؟ ما كفاه يتهجم في عرض أشرف نساء الأرض .. وما كفاه سب الصحابة
رضوان الله عليهم أجمعين .. الحين طلع علينا بفيديو يطالب بوطن قومي للشيعة ..
سماهم الشعب الشيعي ... و شبه الشيعة باليهود .. و في هاي أنا أوافقه .. لاحد من
الشيعة يتهمني بشي .. هو اللي قال ... هو شيعي منكم و فيكم قال .. وعلى فكرة هذا
الخبيث - وسامحوني,ساعات مافرق بين حرف
الباء و النون و أنا أكتب إسمه الخبيث – فإذا صارت غلطة لاتأخذوني ... – المهم هذا
السافل طالب بوطن قومي لليهود .. عفوا ليهود الخليج .. يمتد من الكويت إلى أطراف
الإمارات على حد قوله ... الغريب إنه ما طالب بدبي ..!!
قال – بط الله
سرة النيس – إن البحرين اللي تربينا و عشنا فيها هي البحرين الصغرى .. و يطالب
بالبحرين الكبرى ... مثل ما قلت ..يطالب بالخليج كامل ..ماعدا الإمارات.. كفاية ..
الحين دوري ...
أول شي .. مافي
شي إسمه الشعب الشيعي .. حتى في بلد المجوس ..محد قال عنهم شعب شيعي .. ولا في
العراق – نسأل الله أن يحرره من قبضتهم – بلد البلاء و البدع و الشرك .. ترى اللي
مو عاجبه لايكمل الرسالة ... وما راح أزعل ... أقولها ... مشركين .. و مبتدعين
...و فئة ضالة ... وما هم بشعب .. ولا حتى أمه .. مثلهم مثل ماقال عنهم .. يهود
..و إستحقوا لقب يهود الخليج .. هم في ضلال اليهود و مكرهم .. بل .. أشد ضلالا ...
و أشد مكرا .. لإنهم عرفوا الحق ... و زاغوا عنه ... هم مثل ...النَوّر .. والغجر
.. هذا هم .. وهو ماكذب في هذه .... هم أشد مكرا .. إيه .. لإنهم عايشين بينا ..
ياكلون من خيرات الخليج و يقولون إخوان .. وهم يبون يهجرونه من بلادنا ... مثل ما
سوت اليهود بالفلسطينين ..
يا جماعة ..
خذوا العبرة من فلسطين .. اليهود إشتروا الأراضي .. و تمسكنوا حتى تمكنوا .. و
بعدين صار الفلسطنيين لاجئيين .. هل هذا اللي نبيه لنا ..؟؟؟ ما يبون لا
ديموقراطية ولا بقل ولا رويد .. يبون الديرة .. متى بنستوعب هالحجي ..؟؟؟ و ما
بتوقف بس على البحرين .. على الكويت .. على الشرقية و قطر ... هذا مرادهم ... وهذا مخططهم .. وهو مب شي سري
... قريناه .. وسمعناه ...وشفناه .. بس ما فهمناه ... ليش إحنا نعيش بالإنكار
دايما ... ما صار الوقت نوقفهم عند حدهم ..؟؟ ماصار الوقت اللي يفهم علي سلمان و
ربعه إن هالشي طويل على لحيته النتنة ..؟؟
سعادة النائبة
كتبت على توتير .. يوم الأحد أظن : "ادماج احتياجات المرأة في الموازنات العامة
ضرورة حتمية" ... إنزين ... طبعا هي نفس النائبة اللي قالت إن الملك عبدالله
مخلوق من ضلع إمرأة ... إنزين .. وأنا كل ما أقول إنها تعافت من فيروس الغباء اللي
هي فيه .. أشوف .. لا ... إزداد ... ممكن نفهم شنو إحتياجات المرأة ..؟؟ و جم
المبلغ المحتاجين نخصصه لهذي الإحتياجات ..؟؟؟ وليش الحتمية في الموضوع ... ؟؟؟
وعن أي مرأة نتكلم ..؟؟ وهل كان في بند في الموازنات العامة لإحتياجات الرياييل
..؟؟ و ليش محد قاللي ..!!؟؟ و مدام جذي ... خلونا نسوي بند لإحيتاجات الأطفال ..
و بند لإحتياجات الشياب ... و بند لإحتياجات القطاوة الشيرازي .. و بند للسلوقي ..
و لا ننسى أهم بند .. للخيول ...!
ما ودي أضيف أكثر في الموضوع .. حتى محد يقول إني
"متحامل" عليها .. ولو إنه عندي وايد أقوله .. نخليه لإيام قادمة ...
لعنة
البي بي و الأيفون –
قاعد أتغدى في
السيتي من يومين .. بروحي .. و تعرفوني .. ملقوف .. أحب أطالع في الناس و في اللي
رايح و ياي .. على يميني عائلة من 5 .. كل واحد منهم ميود جهاز في يده يا أما بي
بي أو أيفون .. و كلهم متسمرين بسكوت في أجهزهتم .. و قعدت أراقب فيهم .. الأم
يتها مسج .. قعدت تقهقه عليها .. اليهال مشغولين و الأبو في لالا لاند .. جنه قاعد
يغازال الهيس... الغريب إن الأم ما قالتلهم شنو النكته .. والأغرب إنه محد سألها
... يابولهم الأكل ... الأجهزة ما نزلت من أياديهم .. ما يطالعون في الأكل ..
العيون في الأجهزة ...
حوالي الساعة و
هم على نفس المنوال .. وحوالي ساعة .. محد
منهم قال كلمة للثاني .. على يساري .. واحد هو وزوجته .. بروحهم .. توهم داشين ..
وقعدوا .. طلبوا الأكل .. وإنتهى الكلام .. كل واحد طلع جهازه .. و تسمروا فيهم ..
و مافي كلمة إنقالت .. ولاشي .. عجيب .. صرنا ما نتكلم مع بعض ... الأهل نسوا
التواصل القريب الحقيقي .. وراحوا للتواصل البعيد الإفتراضي ... ليش ..؟؟ ليش اللي
ما نعرفه نفضل نقضي أوقاتنا معاه ...ونترك أحبتنا .. ؟؟؟
في واحد أعرفه
دخل ..وياه الظاهر زوجته .. سلم علي ..رديت السلام .. وقعدوا جدامي .. وهات يا ضحك
.. وكلام .. يرن تليفونهم ما يردون .. أسمع بي بيهم ترن و ترن .. وهم خبر خير ..
إنجبوا عاد .. ما يسكتون .. إستغربت .. قلت لا أنا غلطان في ملاحظاتي و الدنيا
بخير.. إستغليت فرصة المرة راحت الحمام .. وسألته .. أقوله بغشمرة يا فلان .. إنت
وزوجتك أزعجتونا .. كلام وضحك.. عدال عدال .. يلا ..الله يهنيكم ... ضحك و قال ...
هاي صديقتي .. مب زوجتي .. !! قلتله .. صديقتك ..يعني شنو ..؟؟ قال ييياه صديقتي ..
جيرل فريند ... قلت أها .. خلني أروح
طاولتي .. و خل عني اللقافه ... أبركلي...
وبالصدفة البحته
.. شفته ثاني يوم .. ويا زوجته .. في مطعم ثاني بالسيتي .. أدري فيكم ملاقيف ..
تبون تعرفون أسامي المطاعم ... بس مب قايل لكم .. أسويلهم إعلان ببلاش .. حتى
ديسكاونت ما يعطوني.. هععع .. المهم ... تصدقون ما قال لها ولا كلمة .. ولاهي
قالتله شي .. الأيفون و البي بي ما نزل من يدهم ... !!! في شي غلط بالموضوع .. هل
صرنا مدمنيين بي بي و أيفون ؟؟ هل ما عندنا شي نقوله لأقرب الناس .. ؟؟ يعني
الواحد إذا يبي زوجته في الليل ... يطرش لها مسج ... ها شرايج ..؟؟ ماكل سلطة
جرجير عالغدا ..!! تقوله ..إنزين تعال .. بس بسرعة .. معاي 10 دقايق للمسلسل ...
هل البي بي هو لغة الحوار والوسيط اللي بينا ..!!؟؟
كنا زمان نقرا
كتب ..ومجلات و جرايد ... الحين إذا مافي لنك على توتير ما نقراه .. وإذا أكثر من 5
أسطر إنسى الموضوع ..! جم واحد من عيالنا قرا عبدالقدوس ولا الحكيم ولا محفوظ ..
جم واحد منهم يعرف من ذيله ؟؟؟ جم واحد في البحرين قرا أدب عالمي .. الحرب و
السلام .. الأخوة كرامازوف .. آنا كارنينا .. توم سوير .. و غيرهم .. خلاص إنتهى
عصر القراءة... أحد الأصدقاء المدرسين أعطى طلاب صف 9 في مدرسة خاصة يكتبون موضوع
من صفحتين .. موضوع إنشاء .. بالإنجليزي .. يقول مصايب .. يكتبون الموضوع كأنهم
يطرشون مسح عالبي بي .. أو إم جي .. و لول .. و برب ..هذه هي ثقافة البي بي ..
وتشوف بعض الناس
ما يعرفون يختارون بي بي ولا أيفون .. فاتشوفهم شايلين الإثنين .. ويقعدون يناقزون
بين ذي و بين ذي .. و المصيبة الأكبر .. إذا إلتقى خمسة ... بس خمس شباب و شابات
.. وبيحاولون يتكلمون في موضوع .. سياسي .. إجتماعي ...أي موضوع .. وشوف البلاوي
.. بيحطون الأجهزة جدامهم .. وبيكون عندك بالمعدل 8 أجهزة عالطاولة .. يعني بيصير
عندك تليفون يطنطن كل 5 ثواني .. و إنت تتكلم 4 قاعدين يطالعون تليفوناتهم ...
المصيبة صار شي عادي .. يعني حتى اللي قاعد يتكلم ما يحس بقلة إحترام من الثانيين ...
صار البي بي
مكمل لشخص الفرد .. يعني تصور إنك طالع –لا قدر الله – من البيت من غير البي بي !!
بتحس إنك طالع عريان .. صح ..؟؟ أهون عليك تطلع من البيت بفانيلة و سروال من إنك
تطلع من غيره .. أو – لاقدر الله لاقدر الله - ... الخط مقطوع !! كارثة ... تقوم
الدنيا وما تقعد ... ما تخلي أحد من ربعك إلا وتسأله يداينك جمن روبية .. وتقعد
إدور حتى على مئة فلس تحت كرسي السيارة بس عشان تكمل المبلغ .. وتروح إدابج
...وتدفع .. و دايما السؤال .. متى بيرجع الخط ..!!!؟؟
شي طيب إن الناس
ينزلون القرآن الكريم على أجهزتهم .. بس يا أخي ... وإنت في المسيد .. ليش تقرا
القرآن من التليفون ..؟؟ المصاحف متروسة و الحمدلله .. والغبرة عليهم عالقد .. يا
أخي إفتح المصحف ... أبركلك ... بس اللي صاير .. يقرون سورة الكهف من البي بي ..و
ييله .. برودكاست .. تشوفه قلب عليها .. يقراها ...ويرجع يكمل السورة ..
الحسنة الوحيدة
اللي أشوفها لهالأجهزة ... إن مشكلة النسوان الأزلية ..كل نسوان العالم ... إن
زوجي ما يتكلم معاي إلا بالضروري و للضرورة ..شنو الغدا ..؟ اليهال ناموا ..؟ رحتي عند أمج ..؟ أبيج ..تعالي غرفة النوم ...
بس هاي مدى المشاركة الكلامية بينهم .. طبعا ما نعمم ... في بينا شواذ...!! الحين
صارت المرة ما تسأل أصلا لإنها بروحها مشغولة بالبي بي مالها .. و حتى ما أخفي
عليكم ..الرياييل يبون حل لهالقضية ... ما صار عندهم مرة يتجاهلونها .. !!
هلقد صرنا عبيد
للبي بي ..؟؟؟ صارت شوية دوائر إليكترونية تتحكم فينا ..؟؟ و في تصرفاتنا ...وفي
حياتنا .. !!؟ وشركات التليفونات المصنعة و شركات الخدمة عارفين هالشي .. صاروا
مثل بياعين المخدرات .. إيونكم بالطيب و الكلام المعسول و الأسعار الحلوة في الأول
.. و بعدين من أدمنت ... صرت عبد عندهم ... يسوون فيك اللي يبون .. مدمن لا .. !
كفو
والله –
لما أتحامل على
النواب و أعطيهم تحاميل ...لإن فيني حرقة على البلد .. ولإنهم ما سووا شغلهم عدل
.. ولا هم كفو و لا في المستوى المطلوب ... ولكن لما نائب ريال ملو هدومه ... يوقف
و يتكلم بحرقه و قلبه عالبلد من حقه علينا أن نوقف و نصفق له و نشكره .. وندعي له
عساه عالقوه .. هاي الطريقة الديموقراطية .. إطالب بحق الشعب بالطرق السلمية
الدستورية يا علي يا سلمان ...
أرفع عقالي
للنائب عبد الحليم مراد ... و عقبال ال 39 الباقيين .. و مستعد أوقف لهم إجلالا و
إحتراما ... إذا سووا شغلهم .. بس الظاهر باخلي التحميلة في السيارة و في متناول اليد ....
كلمة
و معنى –
سألتني أحد
الأخوات لما شافت برودكاست عن فعاليات "ثورة الميادين" ..و سألت شنو
يعني معنى كلمة فعاليات .. و أنا أشكرها على السؤال و على الثقة اللغوية ... ولكن
أنا ما أعرف معناها – ورحم الله من عرف قدر نفسه – وتوجهت بالسؤال لعالم اللغة
شعبولا .. فقال لي موش فاضي... أنا مشغول و هيهههههههه ... فسألت الدكتورة روبي ..
وقالت إيه أعرف ... وهزت تاشتوشها...يعني .. مؤخرتها ... عشان تلحلح المعلومات .. فعاليات هي جمع مفعول به .. يعني مجموعة من
الإرهابيين يحتلون الوطن و يفعلون به ما يشاؤون ... إيييه ... وواصلت شرحها بلغة
عربية قمة في الفصاحة .. المفعول به يالدالعادي هو الشعب الذي لا يملك إلا أن يكون
تحت رحمة الفاعل .. و المفعول به منصوب عليه بفتحة ظاهره في رأسه و أخرى في ظهره..
وطبعا في قلبه .. من تأثير التفلع بالأسياخ و المولوتوف .. أما الفاعل فهو
مجرور إلى مجاري التاريخ .. وبيكون له
حساب بعدين .. أما إسم الوطن فهو مرفوع على الراس و الأكتاف ... ثم قالت ...و جذي
.. وقالت وجذي بالمصري...
أرجو أن تكون
الأخت السائلة قد إستفادت من الإفاضة الجميلة من الدكتورة ... و عندكم أي إستفسار
لكلمة و معنى .. إرسلوها و نحن بالخدمة ...
DR. KNOW
ياخوي ننتظر مقالاتك بفارغ الصبر عشان نصيح ونضحك في نفس الوقت بمعنى ساعات نضحك لانك تاخذ حقنا في النواب والخمة اللي ما ينطرون المعارضة وحتى الحكومةوتقول شي ودنه نقول بس ما نعرف اشلون انطلعه غصة تتفجر بين كلماتك ونصيح لما نكتشف اشياء تمر علينا وجدام عينا بس ما نشوفها متى ووين صارت هالسوالف ونكتشف انا مغيبين ومخدين مرة بسبب الولاء المطلق ومرة بسسب الكسل المطبق ولا تسال عن الكسل لان الكسل مفهوم تعلمنا من أرقاد الظهاري مثل مفهوم ان المجبوس يرقد عموما خل عنك البربر وواصل كتابة واللي ما يبي لا يقره بس يخلينا نستمتع في كتاباتك ياخي حتى في هالسوالف بدت الناس تتحكم .شكر لك
ردحذف