إلى النواب –
رسالة النواب الماضية حركت الكثير من مشاعر
الأخوة .. وكل الردود كانوا مستائيين مني.. إيه و الله ... يقولون أني كنت متساهل
وياكم .. !! شفتوا شلون .. بس سمعت من إثنين من النواب .. ما كنت ذاكرهم ... يياهم
الدور .. واحد يقول إنت ليش شايل علينا ؟؟ ترى إحنا نشتغل ... و إجتماعات ليل
نهار...ولجان .. ومادري شنو .. خب مب كله عزايم و طهمات ..إنتوا – يقول – ما تقدرون
.. ومهما سوينا مافي فايدة وياكم .. قلتله .. أها ..يعني قصدك ..حالتكم لله يا
ناخبين .. إنزين .. وشنو سويتوا للأزمة ؟ قال .. يا جماعة هاي مب شغلنا ... إحنا
سلطة تشريعية .. هذا شي يخص السلطة التنفيذية.... إيييييه ... صادني الهيس ...
عفوا سعادة الهيس ... فا قلتله .. مادام الموضوع جذي ... عيل ليش حزة الإنتخابات
شعاراتكم كانت .. العمل على إعادة الوحدة الوطنية ... معا نبني الغد .. واللحمة
الوطنية .. والأمن و الأمان.. يدا بيد طالعين رانديفو .. زال إنتوا مب من
صلاحياتكم التشريعية ... لا تنادون فيها ... ما إستحى و قال .. هذي شعارات ..لا
تعني شي... حق الأصوات خبرك ... قلتله ... لا مب خبري .... يعني تضحكون علينا
الناخبين ... قال شفيك إنت متحامل علينا ... قلتله ... أففففف ...ردينا على
التحاميل ... لف خلني أعطيك وحده ... !
أما الثاني ... فقال .. أرجوك من غير أسامي
... بس ودي أشكرك ... وياليت إنت أو الصحفيين ييون و يشوفون البلاوي اللي عندنا
... و شكرا ... هاي الرد ... يعني قط قنبلة و مشى ... تعال ...كمل ... قول ...
فضفض ... ما بقول حق أحد غريب ..كلهم جم ألف اللي يقرون لي .. إفففف... عجبني الشكر ... بس بط جبدي ... يبله تحميلة...
كتب أستاذنا إبراهيم الشيخ في أخبار الخليج
يوم الثلاثا... إن أحد نوابنا الأفاضل ... عليه فاتورة ما دفعها .... و لا عنده
نية يدفعها ... فاتورة كهربا... وتقول جم قيمة هالفاتورة يا بحريني لك الله ...؟؟
أنا باقوللكم ... 37 ألف و 500 دينار و شوية خردة ... بنسامحه بالخردة... تحبوا
أعيد عليكم المبلغ ؟؟ 37,500.000 بالأرقام ... أها ... شاريكم يا جماعة ؟؟ نعم ..
بطة جبد من العيار الثقيل .. تحميلة فيل لبسنا إياها سعادة النائب ... أي فيل ...
هههههه تحميلة ديناصور...
أول شي يخطر في البال .. من جم سنة و سعادة
النائب ما دفع؟؟ تساؤلات كثيرة الحقيقة... ليش ما قطعوا عنه الكهربا طول هالسنين
... ؟ ما يندلون بيته مثلا؟ ما يندلون الفنادق مالته ؟؟ سعادة النائب عنده دخل محترم .. طبعا ما يعتبر من الطبقة
الكادحة الملعون قفدها ... لا حبيبي .. يدخل عليه 5200 دينار شهري ... و طبعا
علاوات .. و حلاوات .. يقولون إن النواب لما خلص الفصل التشريعي الأول و بعد إقرار
أكبر ميزانية في تاريخ البحرين .. كل واحد
من ال22 إستلم شنطة ... مابي أبط جبدكم و أقول شكان في الجنطة... المهم خلونا ويا سعادة
أسود الويه ذي ... سود الله رقاعه ...ما يستحي على ويهه ... 37,500 من أموال الشعب
.. فلوس الدولة ... ما تدفعها ؟؟
إذا .. هو متهاون في فلوس الدولة .. بالله
عليكم .. شلون بيوقف و يحاسب وزير على التسيب في أموال الشعب و هو ياكل فلوس
الشعب؟؟ بالباطل ... يعني يعرف إن المسألة سايبة... و خرطي .. و سعادة النائب يعرف إن أموال الدولة لاحسيب ولا رقيب .. و الكل
يبوق ..و ليش مو هو؟؟ نعم سعادة النائب .. إنت ما تختلف عن أي حرامي ينط على بيوت
الناس و يبوقهم .. على الأقل حرامي البيوت يعرف روحه إنه مب قديس .. بس إنت طالع
على جبال من الأخلاقيات ... إنت عضو في سلطة تشريعية ... تسن القوانين .. قوانين
تعاقب فيها اللي يبوقون من الناس ... الصراحة ... قمة في الإنحطاط...
هذي هي أخلاقيات النائب المحترم ؟؟ إن كان
رب البيت بالدف ضارب, فشيمة أهل البيت الرقص ... و دؤي يا مزيكا .. نوابنا محزمين
وسطهم .. يبون يرقصون عالوحدة و نص.. مادين إيديهم ..وفاتحين مخابيهم .. وسادين
أذونهم عن مشاكل البلد الفعلية.. ومغمضين عينهم عن المفسدين....والنعم ...
بس ماشالله طلع عندنا نائب أسد .. نعم أسد
.. راح تجمع .. ونشر عرض الحكومة .. قالها صراحة و الفيديو موجود .. الحكومة قاعدة
تبوق أراضي ملك الشعب .. وعلينا ناخذها منهم و نرجعها للشعب ... الحين .. النائب
الأولي يبوق كهربا ... والحين نائب ثاني يقول الحكومة بكبرها تبوق ... حلو ...
إنزين و إنت يا غضنفر ؟؟ في مثل مابي أقوله .. بس ولا أكثر من العواهر اللي
يتكلمون عن الشرف هالأيام ... تذكرون قصيدة مظفر النواب ..القدس عروس عروبتكم ..
تتذكرون الكلمة رديفة عواهر ... إستخدموها هني لو سمحتوا ... أبلغ ... أنا أحاسب
مشاعر بعض القراء ... فا ما أقدر أستخدمها ..
هذا سعادة النائب أسامة التميمي ... اللي
قال لسعادة النائبة سوسو ذيج الكلمة ... اللي ما أقدر أستعملها .. وما أبي أعيد
إستعمالها تقوم و تصخني بقضية سب و قذف بعد .. المهم ... سعادة النائب المحترم ..
عليه قضايا جنائية في المحاكم .. سب و قذف .. سعادة النائب طاح طق في خدامته لولا
عناية رب العالمين لماتت من كثر ما شلخ فيها ... هو رياضي ..لا وملاكم بعد .. بس
هاي مب كل شي ... سعادة النائب إنحكم عليه في قضية مخدرات !! نعم .. كفو عليه ...
بس شرد من البحرين قبل ما يسجنونه ... همممممم ... أنعم و أكرم ...
صاحب سوابق يمثلني أنا و أنت !! صاحب سوابق
جنائية يكتب القوانين .. !! مجرم .. مدان .. لا وبعد عينه قوية .. يقول الحكومة
تبوق .. و تدرون من اللي عينها قوية .. اللي ما يدري أو ما يعرف يسألني ... والله
خرطي ... أنا بس خاطري أعرف ... أبي أحد يشرح لنا ... حسب قانون الإنتخابات ...
يرفض ترشح من حكم عليه بقضية جنائية تتجاوز عقوبتها 6 أشهر ولو كانت العقوبة مع
وقف التنفيذ !! شلون هالمدان ترشح ..و إنقبل ترشحة .. وين فحص الصحف الجنائية
للمرشحين ؟؟ شلون أهالي سند صوتوا له ؟؟ ما يعرفونه ؟؟ هالقد غشهم؟؟ في خلل .. من
أجهزة الدولة و منا إحنا كناخبين .. ما سوينا "الهوم ورك" مالنا ... رحنا
صناديق الأقتراع و ما نعرف نصوت لمن .. و ليش .. ما أخذنا الموضوع بجدية....
نستاهل, صار عندنا حرامي كهربا .. و يا عالم إذا في شي ما نعرفه بعد ... و تأكدوا
.. اللي يبوق دينار .. يبوق مليون .. و اللي يبوق مرة ..يبوق مرة ثانية و ثالثة ..
واللي يبوق ... يرتشي .. أنا ما أقول سعادة النائب باق أكثر من اللي نعرفه .. ولا
أقول إنه مرتشي .. بس ...دام الذمة واسعة ...فكل شي جايز...
نستاهل .. صار عندنا واحد من أرباب السوابق
... مخدرات ... مع إني لازم أحسن علاقتي معاه ... يشوفلي شوية حشيش .. بس أنا ما
أبيع مبادئي عشان الكيف ... بس ممقن أأجرها ..هم باعوا و ما خلوا ...أخخخخ منك يا
زمن ... زمن أغبر ...
إيه ... قلنا ... حرامي ... ومخدرات .. بعد
في شي ثاني يا دكتور؟؟ أتحفنا ... أتحفنا
... إيه فيه .. فيه .. أحد النواب ..
إييييه ... إيييييييه ... كان عندهم مطعم ... إييييه ... ويبيع كحول ... خمر ...
متعوده دايماااااااااا .. يعني تصورا إنه مشروع قرار يعرض على المجلس بخصوص
الخمر.. هل من كان يبيع الخمر بيوقف بيعها الحين ؟؟؟ وفي نواب لازالوا يبيعون الخمور..... مخدرات و كحول و سرقة...
هاي برلمان ولا بار؟؟ من صجكم إنتوا ؟؟؟ هاي البرلمان اللي بيقودنا و البلاد لبر
الأمان؟؟ هذي النوعيات اللي بتشرع قوانين ؟؟ شلي مقعدكم يا سعيدي و مراد هناك .. و
لا عندكم .."لكم دينكم و لي دين" ؟؟؟
الغالبية العظمى من الردود على اللي كتبته
عن د. جمال كانت موافقتني .. وبعضهم إعتقد إني كنت عطوف عليه .. فيه ناس إعتقدوا
إني كنت جدا متحامل عليه ... يعني عطيته تحميلة من اللي قلبه ما يحبهم .. وإنه كان
يؤدي واجبه .. أنا ما قلت شي .. يؤدي واجبه .. بس عندنا أولويات .. بالله عليكم
شسوى الدكتور ... إنسوا شسوى ... من دخل المجلس شقال ..؟؟ كيف ساهم ؟؟ يعني
هالديود السيليكون اللي كلش نسبة اللي يخصهم الموضوع ضئيلة لاتذكر... و البحرين
أصلا ما تستورد من هالشركة.. يعني ما عندنا ... يعني المشكلة أصلا مب موجودة ...
يبي يستجوب البلوشي ... يستجوب ..محد قاله لا... بس ياريت إستجوبها على ...
مثلا... عودة الخونة !! و موضوع الكادر الطبي ... يستجوبها على نقص الأسره في
السلمانية .. عدم وجود بعض الأدوية الضرورية... و مئات المواضيع اللي محتاجة
متابعة .. سعادته هد كل هالمواضيع ...وسأل عن الديود!! .. شنقوله ذي ...؟؟ سكت
دهرا ونطق كفرا ...
نوابنا مثل الديود على البغل ...ما منهم فايدة.. ومو موجودين .. ما يهمهم
إلا مصالحهم .. طبعا إلا من رحم ربي ... ما نعمم .. همهم يقوون معارفهم ..و ينمون
حساباتهم ...و شلون يستفيدون من الحكومة و أموال الشعب و يحلبون ديودنا لمصلحة
جيوبهم ... وهالشي يناسب الحكومة ... الحكومة يناسبها مجلس مهلهل .. و يناسبها
نائب غبي .. و يناسبها نائب ما يدفع فواتيره.. ويناسبها نائب هم إختاروه ونصبوه ..
هذا هو النائب المثالي للحكومة ... أما إحنا ... والطقاق ..ناكلها من الصوبين ..
من الحكومة .. ومن الوفاق .. ومن نوابنا..ومن أمريكا ...و من إيران ..و من التجار
..و من رجال المرور..ومن ... ما جنه صار أكثر من صوبين ... مب مهم ... حالتك لله
يامواطن .. وجذي
إلى مجلس الشورى –
شحوااااااال ....مبادرة مصالحة وطنية ها
؟؟؟ إنزين .. مجلسكم الموقر... اللي فيه ناس إنهزامية و جبانه .. ناس إنقلبت على
الدولة في عز أزمتها .. ناس وقفت مع الباطل .. ناس حلبت ديود البحرين (معليه خلونا
في الديود) .. قدموا إستقالات من مجلسكم الموقر..لنصرة طائفتهم .. وبعدين لما
شافوا الإنقلاب فشل .. سارعوا يسحبون إستقالاتهم .. ورجعوا .. شهور و شهور ..
ننتظر أعضاء الشورى يقومون بدورهم بالدفاع عن البحرين .. ومالهم لاحس ولا خبر ..
إختفوا .. مافي إلا سميرة.. و الباقي خبر خير..
الحين إفتكر النواب .. تمخض الجمل فولد
فأرا .. طلعوا علينا بمهزلة و سموها مبادرة مصالحة وطنية .. من يصالح من؟؟ عندكم 3
أطراف .. الحكومة ...الوفاق وربعها ..و السنة .. الحكومة الله يسلمكم قبل فبراير
كانت في غيبوبة.. والأمور عال العال ... و ماشية .. وسمن على عسل .. السنة ...
كانوا نايمين في السمن والعسل ..ولايدرون بالدنيا .. وما أذوا أحد ...ولاطقوا أحد
... ولاقتلوا أحد .. ولا قطعوا شارع على أحد ..و لا شغلوا ميكروفونات ليل نهار و
أزعجوا أحد ... ناس مسالمة... وعندك الوفاق .. وربعها طبعا.. ماشالله ..لحسوا
السمن و العسل ... خططوا لإنقلاب .. شتموا.. ضربوا .. قتلوا .. عذبوا ... بشعوا ..
إنتهكوا ... كل مفردات القاموس العربي تقدر تستعملها ... يعني سووا السبعة و ذمتها
.. فا يا شوريين .. من يصالح من ؟؟
ما أظن إن المحامية الزايد هي نفسها بنفسها
أطلقت هالمبادرة ... مع إحترامي لها .. الموضوع أكبر من الزايد .. المسألة و ما
فيها إنهم إختاروا الزايد و لصقوا لها المبادرة بصفتها سنية .. و باركها البابا
الصالح الأول .. يعني لو الحلواجي أطلق المبادرة أحد سمع له أو عطاه ويه ؟؟ لصقوها
للزايد .. إنزين .. شنو الغرض منها ؟؟ مكتوب فيها ... أن نسمو فوق الجراح ... إيه
... أها ... يعني شرطي إندهس ننسى .. إلا شرطي عاد.. نتكلم عن مستقبل أمة .. خالد
السردي إنطق طق بلا رحمة ولا هوادة ... شعليه أكا تعافى ... و قولة المصريين ...
علقة تفوت ولا حد يموت ... و المسامح كريم .. لإن إحنا أكبر من ذي فعلينا أن
...نسمو فوق الجراح !! بإختصار أقول للزايد و الشورى ... عيييييييييييييييييييييب .... حرااااااااااااااااااام...
متى بيتوقف الإستخفاف فينا و في عقولنا ؟؟ متى
بيوقف الإستخفاف بالأزمة..؟؟ مصالحة عند العشائر مثلا .. ييبون الطرفين و يقعدوهم
مع بعض و هاي يقول اللي عنده ..والثاني يقول .. و اللي عليه الحق يسوون عليه حق
عرب...و يطبخون الذبايح ..ياكلون ..والقشه معدن .... إحنا شلون نتصالح من قبل ما
ناخذ (حق العرب) ؟ إعتذار ما بيعتذرون .. إنزين ما نبي إعتذار ... نبي إقرار
بالذنب .. يفتح الله .. ليومك الجماعة مب معترفين إنهم سووا أي شي غلط ... وإحنا
مساكين ..مهابيل ..في حالنا للحين ما غلطنا في شي .. فإذا إحنا ما غلطنا و هم ما
غلطوا ..نتصالح على شنو ؟؟
ويمكن أصلا إحنا مب طرف في المصالحة ..
إحنا وجودنا تحصيل حاصل .. المصالحة بين الدولة و بينهم .. يقولون الدولة الغلطانه
و عمي بسيوني قال جذي ...و الدولة عليها (حق العرب) و عليها تطلع كل المساجين و
على راسهم مشيمع .. واللي قتلوا الشرطة .. و تدفع تعويضات و تجندس و تاخذ تحميلة ..و
يسوون حكومة منتخبة .. و يمقن نرضى !! بس ما بنتصالح ... هاي اللي تبونه ؟؟
المشكلة سياسية .. على حد زعمهم .. ومافي
داعي للمصالحة .. أعطونا اللي نبي و يا دار ما دخلك شر .. المسأله مب جبر خواطر ..
ولا مسألة عفا الله عما سلف ... المسألة إستمرارية كيان و نظام الحكم ..وحقوق
السنة المسلوبة على مدى سنين و سنين ... أسمعي مني إختى دلال ... شيلي إسمج من
هالمبادرة اللي لا راح تقدم و لاتأخر .. ولا تكوني لاعبة كومبارس في مسرحية فاشلة
و هزيلة ... وجذي
كلمة و معنى –
إحدى الأخوات طلبت مني تعريف لكلمة مواطن
.. وأنا عبالي الكلمة بسيطة .. بس تصدقون ماعرفت أعرفها !!.. هني لجأت إلى عالم
لغوي شعبولا ما غيره تقدس سره وسألته .. فقال دام ظله ... مواطن أصلها من وطي وهي كلمة إغريقية .. فاتقول أفلاطون سوى مدينة
فاضلة و راح فيها وطي ... أي سكن فيها .. وكل من فيها أيضا راحوا وطي .. . وجمعها مواطين .. ومع عامل الزمان ودخول
اللهجه البحرانية .. صارت مواطنين .. ولكن لازال المواطن رايح وطي.. ثم قال ...
وهييييييييييييييه ... و شد نفس من الجوزة .. و طلع من النخاشيش .... وجذي
DR. KNOW
تسلم يا اخي العزيز ، سؤال هل فعلاً الكلام يوصل لهم . اذا الجواب بنعم : فأقول سود الله وجوه النواب ، وسلامتك والله يعطيك العافية
ردحذف