ما مليتوا من السياسة و التفجيرات و الحرق
و هالبلاوي ؟؟ صدقوني أنا مليت .. محتاج بريك .. قلت باكتب شي كلش مالها دخل في
السياسة اليوم ... بس ... ماقدرت .. غصبن عن اللي خلفوني .. السياسة دخلت روحها ..
بس بعد قدرت شوية أوازن ...
إلى منتخب كرة القدم –
مبروك .. ألف مبروك .. يييياه مليون مبروك
... عنبوكم ..ما بغيتوا تاخذوا بطولة .. من زمان و إحنا ننتظر .. الفال لدورة
الخليج اليايه ... بالنسبة لنا كاس دورة الخليح يساوي كاس العالم .. و ننتظره .. و
ياي إنشالله .. الحقيقة لعبتوا رجال و فزتوا رجال .. فرحتونا .. الخونة كانوا
يحرقون و يدمرون و يعتدون .. و إنتو كنتوا تعلون إسم البحرين .. هذي مصيبتنا ...
ناس تبني و تعمر .. و ناس تهدم و تدمر .. الله يهديهم و يشاركونا البناء و الأفراح
و نكون يد وحده .. و لو إني ما........لا بس خلاص خلونا في إحتفالاتنا..
إيييه نسيت – كان في وحده الله يستر عليها
.. ما باقول إسمها فاتن المعروفه بالفاتنه على توتير ما كانت تدري إنكم لعبتوا و
فزتوا .. مب تسكت .. ما قالت خلني أسكت ليه شفت شنو الموضوع ...لالالالا .. من غير
حيا تقول شنو السالفه !!؟؟ المسأله مب مجرد كونها مبارة .. لا هاي كان زمان ...
السالفة أكبر و أعمق الحين ... مسألة فخر و إنجاز وطني ... الإرهابيين عبالهم إنه
ماراح نقدر ننتج من غيرهم .. كانوا يقولون الأطباء وقفتوهم خلنا نشوف السلمانية شلون يمشي ... مشى أحسن من الأول مشكورين ..
المدرسين أضربوا قالوا وقف التعليم .. لا.. تخسون ..خلال 48 ساعة كان فيه 7 ألآلاف
متطوع و المدارس إنتظمت .. قالوا فريق الكورة ما ينفع من غير حبيل و عدنان و غيرهم
.. أبشرهم ...خذنا كاس العرب من غيركم ... قعدوا في بيوتكم و خيسوا ...
شفتي يا فاتن ليش الموضوع مهم .. أخر لج
مره ... ترى المره اليايه بحشش تحشيشة دبل ...و باقعدلج ... بس هالمره سمااااااح
... !
إلى أنا و شوية حبايب
–
لما إبتديت أكتب الرسايل الخاصة كانت بتكون
وحده , و الدليل إنه أول وحده كتبتها كانت من غير رقم .. وبعدين صار القراء يطلبون
الثانية ..و بعدين يسألون وين رقم 3 و 4 وهلون لين صرنا اليوم 16 .. و هاي صار
يخلي علي مسؤولية .. مسؤولية إني ما أتأخر .. دايما أحاول التجديد حتى القراء ما يملون
.. أكون ضيف خفيف عليكم .. أعبر عن اللي في قلبكم ..و اللي في راسكم .. مسؤولية
عودة يا جماعة .. و بما إني ما أعرف أكتب إلا أكون محشش ..فمصروفي زاد ..و إنتوا –
إيه إنت اللي قاعد تقرا الحين – ولا سألين .. بس تبون كل يوم رسالة و بس ...
عبالكم كن فيكون ...
وعليه .. وبعد التمحيص و التحميص .. و مشاورات
مكثفة مع القراء الإعزاء .. و إجتماع جمعية عمومية كنت أنا فيها بروحي .. وبعد
نصايح من بعض النواب الأعزاء عن كيفية رفع عريضة مطالب .. قررنا فتح حساب في بنك
المستقبل الإيراني فرع مأتم كريمي تحت إسم – الحملة الوطنية لدعم الحشيش لدكتور نو
لمكافحة المد الصفوي ومكافحة بيع السيارت في الشوارع .. وحاليا بتكون المبالغ المقدمة منكم غير محددة
.. بس كل ما زادت , كل ما زادت القدرة الشرائية الحشيشية, كلما زادت الرسايل ..
اللي يقرون لي ماشالله وايد .. ما أبي أقول
العدد بعدين تقولون قاعد أفوشر .. بس إنتو أقل من 10 مليون قارىء !! و أحبكم كلكم
.. ما عدا اللي خبركم اللي يقرون و يدزون مسبات .. ما عندهم سالفة .. بس حبيت أوقف
للحظات و أذكر بعضكم اللي لهم معزة خاصة في قلبي و في نفس الوقت أدري إن لي معزة
خاصة في قلوبهم .. و هم اللي يشجعوني على الإستمرار .. وهم اللي بيودعون في بنك
المستقبل أكبر مبالغ ... واللي ما إنذكر مو معناته إني ما أعزه أو شي لا ... بس
عليهم إيداع مبالغ و أنا بأسويلهم رسالة خاصة جدا .. المهم خلوني أذكر .. المشكلة
في من أبتدي ؟؟ إنزين ..من غير ترتيب ..أوكي؟؟ ..
@D_alshamlan لافندر .. إنتظر دايما تعليقها .. و ما أرتاح
إلا لين علقت ..و الأسبوع اللي طاف حضرتها سافرت من غير ما تقول ..وطبعا يعني ما
علقت.. يعني عليها غرامة.. لافندر هي الغلا ما ينقص منه إلا زاد ..
@_moon_shadow من أوائل الناس اللي الحقيقة خلوني أنتبه إن
اللي أكتبه مهم و يستاهل المتابعة .. وتشجيعها لي كان من أول موضوع .. تسلمي
يالغالية..
@elriffa3 لطيفة – يا ويلي منها إن شطحت في الكتابة شوي !! أحسب لها .. بس
من المتابعين المخلصين المثقفين .. تعجبني..
@BlackJguar ما عندها يما أرحميني ..متشبثة برايها و دايما
غلط !! ساعات شرسة ...بس قلبها أبيييييييييض وايد سوفت .... يا زينها .. بي جي من اللي يفرضون إحترامهم و
حبهم .. مسكينة اليوم خلص عليها ليمت التوتير و قاعده على نار .. تقرا و ما تقدر
ترد !! كسرت خاطري... بس كنت أدافع عنها .. إييييه...
@pinkii_heart من أكثر المتابعين لي .. و أكثرهم حماس ..
تخجلني ساعات ..ما تناديني إلا مبدعنا .. شهادتها فيني مجروحة شوي .. أعتز في
تعليقاتها و تواصلها... ملقوفه مثلي !
@alfatena فاتن يا فاتن .. توني كاتب عنج فوق .. ما كانت تدري إن البحرين
فازت بكاس العرب.. أول من علق على أول موضوع .. و بعدين إختفت .. وبعدين رجعت ..
قالت وييييه مادريت إني ما سويتلك فلو !!.. عبالي وقفت الكتابة .. اللي ماخذ عقلها
!! ... غلاها في القلب.. رائعة يا فاتن...
@Dana_80 أول مرة علقت كان على رسايل 15 فهي يديدة ..و لكنها أثرت فيني
فإستحقت إني أذكرها.. شكرا دانه
@4everBahraini دايما
تعلق ..و عبالي إنها ولد !! الإسم خدعني ييييياه .. بس صححتني و بكل ذوق .. أخلاق
عالية .. رايتها بيضه..
وفيه طبعا مثل ما قلت ناس وايد متابعين و
سريعين إنهم يسوونلي ريتويت و منهم المذوقه @sosobahrain و أحلى كشه @nalsowaidi و المتألقة @ManalAlawadhi و الجميلة @Haya_Mohd و الأصيلة @BintAlmaidan والغالية
@hayfahayfa .. و أحلى عين @7alaElba7rain وغيرهم كثير .. و رجاء إذا أحد ما قلت إسمه .. ترى ماله أي دلاله
.. في لا تحطوا في بالكم .. وعلى فكرة .. مب كل المتابعين من الجنس اللطيف, الله
يزودهم لي إنشالله .. لا في خناشير وايد بعد ..باذكرهم سريع أحسن لطيفة إطرشلي مسج
الحين ..
الحبيب الغالي @bu__abdulla دايما مشاركات بناءه.. @ActivateBahrain دقيق و مثقف يعجبني .. @khalifa7arghom وطني مخلص .. @FawazSulaibeekh اللي ما يطق بريكات في سترة – يعجبني وايد
.. @BAHRAIN_SWORD ما يكل ولا يتعب من ملاحقة الخونه.. @AmootFelBahrain شجاع و عنيف على الخونه طيب مع أهل الحق .. @3ayoonalbahrain يكفي إنه مقاطعهم .. @DrRAljowder المحلل الإستيراتيجي
الأول في البحرين .. @BahrainiKhaliji .. @silveralkhaldi .. @bahrainiriffai اللي شرفني بمقال .. @MohdZayani ولا أروع .. @ECOKHA .. @thebahraini
.... @bohamad04..المقاتل الرائع @french_sultan ... @Bin_HAMADA جني طولت عليكم .. و في أسامي وايد أحب أذكرهم بالعرفان .. محتاج وقفة
ثانية في رسالة قادمة ..
إلى الجميع .. أشكركم .. و تذكروا .. أنا
منكم و فيكم و إليكم .. و إنتوا بس إستعجلوا في إيداع الفلوس في بنك المستقبل ..
ما عندي رقم الحساب .. إنتو بس قولوهم هاي الخمس مال الحشيش لدكتور نو و هم بيعرفون
...
برلمانيات -
عجيب أمر النواب .. ما فيهم ريال واحد أو
مره وحده يوقف ويقول أنا وقعت على العريضة .. أو أنا شاركت فيها .. أو تبنيتها ..
ال 40 نايب أنكروا أي علم فيها .. الظاهر اللي قدم العريضة كانوا ينانوه منقهرين
على بوقيس .. شافوا الدنيا قامت عليهم قاموا إنخشوا .. نواب أخر زمن .. تخاف ما
تختيشيش .. الصراحة .. كنت باحترمكم لو اللي كتبها وقف و قال .. أنا .. و يبرر
موقفه .. و يقول حسبتها غلط يا جماعة ..و أنا بشر و أخطىء .. و إنتوا الصح .. و
سامحونا .. بس اللي نشوفه .. إن كل وحد منهم يقول أنا كنت ضدها و رفضت أوقعها
..... ييييياه شهالحجي ذيييييي ... عيب .. إحنا مب هالقد أغبياء عاد .. أفيييييه ...
زعلان منكم ... كلنا زعلانين منكم ... و إنشالله في إنتخابات بتصير ... و راح نشوف
..
محاولة شعرية –
زماااااان ... أيام كنا رايقين .. و ما
عندنا هم ... و كنا ما نعرف السياسية و لانهتم فيها .. هاي كانت شغلة الحكومة (عيل
ليش إنتخبناها !!!) ... و الجرايد ما نقرا إلا الصفحة الرياضية ... تذكرون هالأيام
... أييييه عليها ... المهم كنت أحشش عشان أكتب أشعار و أقعد أتغزل في فلانه و
علانه ... قيس بن الملوح زماني كنت ... عاد أسميها مجازا أشعار ... لا أعرف في
العروض و لا البحور (غير بحر الحورة) ولا الأوزان .. فا اللي يعرف هالأشياء لا
يقولي مو موزنة .. ترى أنا وزنتها في برادة راج كومار و طلعت 3 كيلو إلا شوي ..
هاي وحده من اللي كتبته وزملائي شعراء الجاهليه ينذكرون بالخير يبون يعلقونها بس
أنا رافض لأني أخاف يقومون و يدرسونها بالثانوي .. و بوت مشكل .. و كانوا يبوني
ألقيها في سوق عكاظ بس ما مداني أروح ..فألقيتها في سوق واقف - القطعة قصدي المعلقة إسمها الترياق ...
إنشالله تعجبكم
حبكِ في النـــهار
شـــــاغلي وفي الليـــل معــذب
مـــــؤرق
لا نامــــت مقلــــــتي ســـاعة و ماكـــان جفنـــاي في تــــلاق
زاد الليل من سهادي فما زال و
ما جاء بعده يوم بإشــــــراق
وما غد عن ســالفه بإمثــــل وما
هدأ القلب وما خف إشتياق
أمني القلــــــب بغد أفضــل يكــون فيه قلبــك خير الرفـاق
لو كنت أعلم أن حبك قاتلي لإستعجلت
الموت وما بكت المآقي
وهانت الروح فداكي والقلب وجعلت
دمي للريـــاحين ساقــي
وما كان خنجر ولاسيف قاتلي يكفيك
حفنـــة أغصان من زنبق
معذبتي بالصد فما إلا للـــه أشكو
البيـــن و طول الفــــراق
أنتي الـداء ومنك الـــــدواء والعين
و الفـــؤاد في إحتــراق
أصابني داء غرامك ينحلني فرق
الطبيب من سقمي المحاق
فقال يا بني إذهب وفـــؤادك ففي
شفتيها يكــمن التريـــــــاق
قلت كيف الوصول إلى شفتيها فوالله
تشفني لمسة يديها أوعناق
إن لم يكن لنا في الحياة تلاقي فمــا
لنـــا فـــي الخيال إفتــراق
أيا صاحبي إن أردت العزة في العيش فلا تكن أحدا من العشـــــــــاق
سلمتوا...
سينما مصرية –
السينما المصرية متروسة كلاشيهات .. و
أتكلم عن أفلام أول .. ما أشوف أفلام هالأيام ذي ..أحس الممثلين كلهم بلاستيك ..ما
فيهم شخصيات مميزة .. كلهم مستنسخين.. أيام أول كل ممثل له شخصيتة .. ماري منيب –
زينات صدقي – عبدالفتاح القصري – وداد حمدي – ماجده – توفيق الدقن .. و غيرهم وايد
.. كل ممثل منهم ترك شي في كل واحد فينا .. موقف .. لقطة .. مشهد ..لازم في شي تتذكره
و تضحك أو تتفاعل معاه .. صح؟؟ بس العيب في أفلام أول كان الحزن و الخوف هو السائد
.. حتى في الكوميديا .. و كان يعيشونه إنه في مصيبة بتحصل حتى لو ماكان في .. شي
عادي جدا إن أحد يطق الباب ..فبدل ما أحد يروح يفتح .. يقولون .. مين اللي هيجينا
الساعة دي !!؟؟ لا و الساعة يا دوب 7 المغرب .. يا رب أستر يا رب .. قال ياللي
قاعدين يكفيكو شر اللي جايين ... يعني ليش أبي أفهم المصيبة بتيي من طقة الباب
!!؟؟ ليش الناس قاعدة على أعصابها ؟ و نفس الشي .. التليفون يرن .. مع إنه ذيج
الأيام في مصر معجزة إنك تحصل حرارة في الخط (جذي كانوا يسمونها ) ههههي .. المهم
... التليفون يرن .. و يقعدون يطالعون في بعضهم .. و قبل ما يردون ...دعاء ... يا
رب يجيب العواقب سليمة .. ويده ترتعش و صوته يتحشرج يقول... آلووووو..فالجيل مالنا
ربوه على الحزن و الخوف ... سوولنا عقدة ... يا ساتر تليفوني يرن و الباب يطق ...
الله يستر... إذا ما شفتوني خلال يومين فإعلموا إنه مصيبة حلت من هالتليفون ...
خلوني أرد .. آلووو .. من ؟ إنتي؟ ... هلا عمري .. لا المكالمة مالت مغازل بس إنتو
خليني أكمل المكالمة ... جت سليمة..
SMS – فاطمة الحواج
خلج آدمية يا فطوم ولا تنجري ورا نبول ,
اللي بيته من زجاج يا فطوم .. يبين كل غسيله الوسخ و نتمنى إنه ما نوصل لي
هالمرحلة.. فهمتي طبعا يا بطة ؟؟
DR. KNOW
ليست هناك تعليقات:
إرسال تعليق