رسائل خاصة بس بدون زعل 58

تهنئة لجميع القراء الأعزاء بحلول شهر رمضان المبارك – نسأل الله أن يعيننا على صيامه وقيامه و التقرب إليه بالصالحات من الأعمال ..

تقرير التجمع السياسي –

أنا قلت الأسبوع اللي طاف إن جمعية التجمع هي جمعية ملك لإهل الفاتح .. الفاتحيون هم اللي سووها .. هم اللي خلقوها .. وبعدين إستولى عليها المرتزقة والمنتفعين والمشكوك فيهم .. وعلى راسهم هاشم والحويحي .. وقاموا وخاصة هالإثنين بتكوين مراكز قوى لهم داخل التجمع .. غرضهم .. أول شي الإنتفاع لشخصهم الكريم .. ثاني شي ... لا بس .. هي الإنتفاع لشخصهم الكريم ... والمشكلة إنهم على غباء سياسي ما شاءالله عليه ..

عبدالله هاشم تاريخه إحنا عارفينه وساكتين .. من أجل الوحدة .. أكلنا تبن وسكتنه .. والحويحي .. مسكين .. عمره ما كان لا في العير ولا في النفير .. طموحه يصير وكيل وزارة .. وما صار .. وجمعيتة هز الوسط العربي فاشلة و غير موجودة على الخارطة السياسية للبحرين .. الإثنين حصلوا فرصتهم في التجمع .. ودخلوا الحياة السياسية .. وإجتماعات ... وعطايا .. وهدايا .. وأراضي ... بعد أراضي ..!!؟؟ يقولون .. والله أعلم في الأرض اللي عند الدرة لمن .. مالنا شغل .. لا وقاموا يسافرون .. ويجتمعون .. ياه ياه .. صاروا بني آدميين ... طلعوا على ظهري وظهرك يا فاتحي .. والله يعينا ..

الحين .. يحصلون هدايا وعطايا .. أوكي .. بس يجاملون على مستقبل البلد .. لا .. لا يا هاشم .. أوقف حدك ... وإذا مب محصل أحد يوقفك .. بنييك ونوقفك .. إنت والحوحو اللي وياك .. كفاية ... كفاية ... إحنا أعطناكم الشرعية .. وأنا واحد من الناس أقول ... طز فيكم إنتوا الإثنين .. سحبت منكم الشرعية .. إنتوا الإثنين أساس البلى في التجمع والإنهيار اللي صادة .. إنتوا مثل السرطان .. كبرتوا في الجسم .. وأخرتها الجسم بيموت وبتموتون معاه ..

أبي أعرف .. وين الشيخ المحمود من كل ذي ...!!!؟؟ لا حس ولا خبر .. ليكون رايح تصيف في سان تروبييه يا شيخ وما قلت ..!؟ يمكن ما سمعت باللي صاير ..؟؟ وينك يا شيخ .. حرام عليك .. بتطلعني عن طوري بالسلبية اللي إنت فيها .. إحنا إخترناك إنت .. وإنت اللي لابس البشت .. واللي يلبس البشت يكون قده وياخذ موقف .. شلون ترضى إثنين تافهين يتحكمون بالتجمع .. مالهم حق يا شيخ .. ولا إنت لك الحق توقف موقف المتفرج .. لا أبوي .. أوقف .. وإحزم الأمر .. شيخ إن كنت لاتدري فتلك مصيبة ... وإن كنت تدري فالمصيبة أعظم ..

اللي مب عارف يلا يعرف .. جمعية التجمع ماتت .. إيه ماتت .. ولا حد صلى عليها .. ولاحد يبي أصلا .. بس ماتت ليش ..!؟ ماتت موؤدة يا شيخ .. غاشم والحوحو دفنوها .. وأخرها بالتقريرين اللي كل واحد أسخف من الثاني .. التقرير السياسي والمشروع السياسي ... التقريرين هذيله إستعملوهم ورق تواليت في حمام عربي .. مستواهم .. وما يليق فيهم...

حرام عليك يا شيخ .. والله ثم والله إني أحبك .. لكن كون إنك تسمح بهالتقريرين بإسم الجمعية فيخليك شريك في الجرم ... نعم .. هالتقريرين جريمة .. جريمة في حق البحرين .. وفي حق أهل الفاتح .. ويمكن في حق القيادة .. شنو القصد منه .. ؟؟ من تبون تراضون ..؟؟ الحكومة ... ؟؟ ما أظن ... الفاتحيين ...؟؟؟ أكيد لا .. عيل ..؟ ما بقى إلا الأمريكان والوفاق .. وأكيد هم راضيين عنكم كل الرضى .. مبارك عليكم ...

شنو الفرق بين مشروعكم السياسي ومشروع الوفاق السياسي ..!!؟؟ ها ؟  والله كإنكم ناقلينه حرفيا منهم .. وأكبر هدية قدمتوها للوفاق ... صك براءة من كل الأعمال الإرهابية .. والتحرق والتعطل والقتل ... ولا تنسوا الإنقلاب .. بس عيل أبوي .. أطلبوا من أهل الفاتح يبتدون تحرق تايرات ومولوتوف .. هاي اللي باقي .. يلا .. خلهم يحرقون في الزلاق .. والرفاع الغربي وجو وعسكر وجزيرة حوار .. يلا ... ما إنتوا وصل فيكم الغباء إنكم تفكرون مثل الوفاق .. فإذن في خلل .. إما الوفاق على حق طول هالمدة وإحنا ظالمينهم .. أو إنتوا الإثنين وجهين لعملة وحدة .. واللي يضحك .. فعلا يضحك .. صاروا الموالين للجمعية يسمونا طبالة .. حتى إنت يا بروتس ..!!؟؟ هالقد أخذتوا من الثقافة الوفاقية .. لاحول ولا قوة إلا بالله .. 

جمعية التانغو ذي فيها مدسوسين .. وفيها من هم أشد وفاقا من الوفاق .. إيه نعم .. وأولهم المدعو هاشم ... هو يمثل جناح الوفاق في جمعيتكم .. الجمعية اللي تدعي إنها تمثل التيار السني .. وأكبر جمعية .. وأكبر طل في تاريخ البحرين السياسي .. هالجمعية صوت في إنتخاباتها أقل من 300 شخص .. بس ... إذا .. وإذا عودة ذي .. إذا بقيتوا لإنتخابات 2014 وفي أمكم خير دخلوا شخص واحد في المجلس .. ! وأنا أتحداكم ..

إحنا في وقت صعب .. الإختيارات صعبة ودقيقة ومافي وقت للمجاملات على حساب البحرين ... إما أبيض .. أو أسود .. الرمادي والأحمر والأخضر .. ما يمشي .. يا أبيض .. يا أسود ..ومحاولات الدخول في مناطق شبهات ما راح يساعد .. وراح يأزم ويشق الصف .. وهاي اللي صار .. وبعدين خلوني أقول شي .. أدري إنه في بعض الإيجابيات في التقرير .. بعد إذا ما حطوا فيه شي إيجابي مصيبة .. ولكن العسل إختلط بالسم .. وفسد العسل ..

أتذكر في الفاتح .. كل الناس تقول غير خليفة ما نبي .. هاي كلام أهل الفاتح .. والميثاق اللي صوت عليه كل الشعب .. قال للملك حق تعين وتغير رئيس الوزراء .. وتيون إنتوا الحين وتقولون حكومة منتخبة ..!! أو إذا عينه الملك لازم النواب يوافق ..!!؟؟ ودورتين بس .. من وين إطلعون بالحجي .. أهل الفاتح يبون خليفة بن سلمان إلى أن يأمر الله .. هاي اللي يبونه .. وإنتوا إنقلبتوا على أهل الفاتح وتبنيتوا كلام أهل الدوار .. وتقولون إحنا طبالة ..

جوفوا الجمعية ملك لكم ستانسوا عليها وهي تموت .. وإذا تحبون ضموها للوفاق .. مب مشكلة .. بس التجمع ملك لي أنا و350 ألف من عائلتي و أصدقائي المقربين .. خذوا جمعيتكم ... ورجعولنا تجمعنا .. ما تستاهلون تحملون إسمنا .. وحركتنا .. وتعبنا .. وصراخنا ..

كلمة أخيرة في الموضوع ... إسمعوا صوت الناس ولا تستهينوا فيهم .. سويت تصويت ولحد الآن 13% مع .. و83% ضد .. واللي يبي يصوت مفتوح لتاريخ 20 .. وإقروا التعليقات ..

منصور العريض –

نائب شوري سابق .. وما شاءالله عليه .. عنده علاقات قوية مع الحكومة .. والوفاق .. والأمريكان ... وبوزنر ... والإنجليز .. وبابا الفاتيكان .. واليهود .. وصلاح البندر .. وحتى يمكن ويا حارقهم .. !! بس يا ترى .. ومجرد سؤال بريء... ليش الدكتور قاعد في أمريكا صارله فترة ... يصيف ..؟؟ مممممم .. ما أظن ... لا .. مريض ..؟؟ إسم الله عليه .. ما أظن ... ما يندرى ليش الحقيقة .. بس حبيت أسأل عنه .. ومصيره يرد الديرة .. واللي طول الغيبات ما دري شيسوي بالغنايم .. وما يندرى .. يمكن الغنيمة موجودة بالديرة أصلا ... !!! 

جريدة الوسط –

تعرفوني أنا ما أسميها إلا سخيفة الوسخ .. وهاي الأقرب للحقيقة .. بس في يوم الأثنين اللي طاف ... منزلين تحقيق عن سد الشوارع ... ولإول مرة .. الوسخ تنقل الصورة الصعبة اللي يعيشها الشيعة في قراهم .. مب من الحصار الحكومي أو التضييق الحكومي .. لا .. من أفعال اللي سموهم "الشباب" ... والتقرير صج يبيله وقفة..

كل اللي تكلموا معهم الوسخ إتفقوا على إن حياتهم صارت في جحيم من أفعال "الشباب" .. هالشباب هم في الواقع مخربين وإرهابيين ومجرمين .. بس هم سموهم ... شباب .. إنزين .. مب مشكلة .. يصير إن الشاب يكون مجرم .. ما يصير ..!!؟؟ إيه يصير ونص بعد ..

الناس تشتكي .. وحدة تقول .. أظن إسمها فاطمة .. تقول ولدي مريض وصار عنده حالة طارئة تستدعي المستشفى .. تقول طلعت من البيت وكل الشوارع مبنده بالطابوق و الحاويات و تحرق تايرات .. وردينا البيت .. ما قدرنا نطلع ... تقول .. من بيعوضني إذا ولدي مات .. !! ؟؟ صج من بيعوضها .. علي سلمان ولا عيسو قاسم ..!!؟؟ من ..؟؟

واحد يقول .. زوجتي راحت تزور أهلها في قرية ثانية .. وفي الليل ما قدرت ترجع البيت لإن قريتنا بندوها "الشباب" .. ورجعت تنام ليلتها بيت أهلها .. واحد ثالث يقول ... ساعات ما نقدر نوصل لإعمالنا لإن "الشباب" يحطون الموانع ويروحون ينامون ليلهم الطويل الهني وإحنا نعاني .. وتبقى المتاريس إلى أن يوصل عمال البلدية ويشيلوها ...

إحنا من أشهر ونقول إن الآذى يطولهم في عقر قراهم مثل ما يآذينا إحنا .. بس كانوا يكابرون ويقولون لالالالالا ... كل شي يهون في سبيل الهدف .. طل .. الوسخ تنقل شهاداتكم .. شهود منكم وفيكم .. من الناس المتأذية .. ولا حد سائل فيهم .. لا علي سلمان ولا مرزوق ولا عيسو .. محد .. أكيد "الشباب" ما يسئلون فيهم .. أخر همهم .. المهم يقومون بعمل بطولي وثوري وسلمي ويسدون شوارع قراهم على الناس الفقارة .. وبعدين .. روح حمل الحكومة مسؤولية الناس اللي تموت وهي ما تقدر توصل للمستشفيات .. بس المهم يحطون صورهم على توتير وهم يناقزون مثل السبلان فرحانين بالإنتصار المدوي من حرق جم تاير .. بطولة ...

اللي لفت نظري في التقرير شي واحد ... لما الوسخ تسوي مقابلات مع أهل القرى وفيها نقد وهجوم على الحكومة يحطون إسمهم بالكامل .. واللي في المسيرات يصورهم .. إيه .. صور ويوهم بالألوان بعد .. ومب قاصر إلا يحطون أرقام بطاقاتهم الشخصية ... أما التقرير ذي .. إكتفوا بالإسم الأول وبس ... يقولك .. حسين ثلاثيني من المحرق .. فاطمة .. من إحدى القرى الشمالية .. لا إسم ولا صورة .. ولا شي .. ليش ..!!!؟؟

أقولكم ليش .. لإنهم خايفين من "الشباب" .. خايفين يضربوهم .. يحرقون بيوتهم .. يغتصبون نسوانهم وأولادهم .. ويمكن يقتلوهم بعد  .. لإنهم صاروا "الشباب" مثل الفتوات .. أو المافيا .. أو حتى الشبيحة .. أهل القرى يعرفون إن الحكومة ما راح تأذيهم بس لإنهم تكلموا ضد الحكومة ولكن ربعهم ... مجرمين .. بيلعنون قفدهم .. أقل ما فيها .. أقل شي .. بيسمونهم خونة .. !! وبيقاطعوهم .. هذي هي ديموقراطية علي سلمان وثوار 14 فبراير .. ديموقراطية قايمة على إرهاب ربعهم .. عيل إحنا شبيسون فينا .. !!!!!!؟؟؟   

أرجوكم الدخول على هذا الرابط من إنتاج  @ummohanned  بعنوان ثقافة التخريب .

هاني الفردان سخيفة الوسخ –

حمار سياسي .. ( والحمير بالكرامة ) ..

سوق المقاصيص –

الموضوع فيه إن ... ولا تقصون عالمقاصيص اللي مثل حالتي .. شالسالفة من الأخر .. وبعدين العيد في الطريج .. من وين أشتري ثياب العيد ها ..!!؟؟ عالأقل المودا موجود وبنفس الأسعار التنافسية للمقاصيص الله يعينهم ..

سوريا –

دخلت معركة سوريا مراحلها الأخيرة .. وصلت المعارك دمشق على أبواب بشار الكلب .. وهذي بداية النهاية .. التفجير اليوم ضربة موجعة ... مب لبشار الكلب .. لا .. لإيران وروسيا وحزب اللات ..  الحين بتبدي تجوف إنشقاقات أكبر وبوتيرة أكثر .. والعنف بيزيد .. بشار على الحبال .. ووبيقعد يعافر بيديه وين ما تروح تروح .. القتل بيزيد .. بس البشرى إن أيامه معدوده .. وأنا أقول بقى له ساعات بس .. وأقرب المقربين له بيقولون يالله نفسي ويشيلون عليه .. نهايته بتكون بشعة .. وهو حيوان .. ما تعلم من القذافي .. إطلع دام إنت قادر .. بس ما راح يطلع .. لإنه غبي .. ودموي .. مثل أبوه .. كلها أيام وضريح أبوه السفاح بيتدمر .. وينمحي ..

أجوف إنهيارات النظام قادمة .. وبحول الله بتكون مثل قطع الدمينو .. وبيحصل بشار الكلب روحة محاصر ولا بيقدر يوصل بالمروحية لمدمرة روسية تحمية .. أنا أعتقد إن أغلب الوقت موظفين بشار ووزرائه قاعدين يحرقون أوراق ويتلفون ملفات .. يعرفون إن بعدين ما بيكون عندهم وقت يطفون زر الكهربا .. وقرب الوقت للقتلوا الحريري يواجهوا العدالة .. وسفاح بيروت رستم غزالة بيذوق الذل اللي كان يذوقه للأبرياء ... ويمكن بيحس بحبل المشنقة يحضنه من رقبته ويهوس عليها .. سبحان الله قتلة الحريري قاعدين يموتون بنفس الطريقة اللي ذبحوه فيها .. الله أكبر .. الله يمهل .. ولا يهمل ..

أنا مب خبير عسكري .. ولكني أعرف إن مرحلة الحسم إبتدت .. وراح تنكسر شوكة إيران وحزب اللات والعزة .. وخلال ساعات ...  وإن شاءالله نبتدي نسمع أخبار طيبة .. قولوا إن شاء الله .. وعلى فكره .. ضيعت رقم بوتين في الكرملين .. فإذا أحد عنده إياه .. يتصل عليه ويقوله د. نو يقولك لا تعب روحك بالفيتو ومافي داعي فصل سابع ولا تاسع .. وطلعت حمار يا بوبو .. إخترت الجانب الغلط .. وخسرت ..

إيران و 5+1 –

ويقولون إيران مالها خص بالبحرين .. إنبح صوتنا وإحنا نقول إيران وإيران .. وهم يقولون .. جوفوا ... أكا تقرير عمي بسيوني .. يقول براءة .. فخلوا عنكم .. ثورتنا بحرينية وأبد مافيها أصابع إيرانية .. إلا مول مافيها .. اليد الإيرانية داخلة للزند .. وإنتوا تقولون ما نحس بشي .. لا وتكذبون بعد ..

إيران عندها مفاوضات بخصوص برنامجها النووي .. وحاطة 5 شروط منها رفع الحظر عليها وإعتبارها دولة نووية وتوقيع إتفاقية تعاون مشترك إلى أخره .. بقدرة قادر .. تحاول إدخل ملفين على مفاوضات خاصة بالبرنامج النووي ومالهم علاقة ببرنامج السبزي مالهم .. تبي تتفاوض حول الملف السوري والبحرين .. قولة واحد رفيجي أردني .. إيش جاب الطز للمرحبا ... شدراني روح إسئل جليلي ..

الإهتمام الإيراني في سوريا والبحرين واضح .. وهي متغلغلة فيهم لكشة حواجبهم .. وعلى فكرة هذي ثاني مرة تحاول إيران .. المرة الأولي في إجتماعات شهر مايو اللي طاف في بغداد .. والحين تحاول مرة ثانية .. المحاولات مالتهم تدل على إن لهم حبايب في البلدين يبون يساعدوهم .. قنوات العالم والمنار ومادري منو مب كفاية .. الحين يبون (يدولون) البحرين وثورة الشيعة في البحرين .. ولكن .. طز يا جليلي .. روح إلعب غيرها ..

الإيرانيين ييعرفون إن بشار إنتهى .. والحين يحاولون بكل الطرق تقسيم سوريا عشان يبقى لهم موضع قدم .. بس الأمور خرجت عن السيطرة الحين .. وبالبحرين يبون موضع قدم .. يبون الشيعة في الحكم .. وبعد شوي مب غريبة تسمعهم يبون يدخلون ملف القطيف .. وباجر ملف الكويت .. وما بنخلص ملفات ..

كنا نتوقع الوفاق يطلعون بيان .. وتوقعنا ما كان في محله .. كالعادة طبعا لما يتعلق الموضوع بإمهم العودة ... السكوت .. التطنيش .. هاي سياستهم .. ما يقولون ..لا إيران .. جوفي حالج إنتي وإحنا بنتطاقق ويا الحكومة هني لإنه حراكنا وطني .. لا .. ششششش .. هشششش ... ولا كلمة .. يلا برو..

اللحمة الوطنية –

من جم شهر ذبحونا في الإعلام وهم يتكلمون عن اللحمة الوطنية .. أنا عبالي يتكلمون عن تصدير اللحوم إلى دول العالم وخاصة دول متخلفة مثل جيبوتي .. قلت والله زين عندنا فايض من اللحم .. التصدير زين .. ووين ووين ليه فهمت إن أنا فاهم الموضوع مقلوب ... أثرى قصدهم إستيراد لحم من جيبوتي مب العكس .. إيه .. فهمت ..

ويابوا لحم .. لحم عجل .. مثل الإمام الفاني عشر .. مادري ليش يسمونه عجل .. وفي الحقيقة هو تيس .. المهم يابوا بقر .. وطلع فيهم أمراض الدنيا .. من حمى قلاعية ونخاعية وخلاعية ... وأمراض ما قط سمعنا عنها .. وقالوا .. بونا بيتيت .. يعني كلوا بالهنا والشفا .. أي شفا وأي هنا الله يقل هناكم ..

أنا للحين منتظر من الصحة ولا البلدية يقولون لنا إسم المورد .. ومن اللي سمح باللحمة الوطنية تاخذ جواز سفر وتصير وطنية وتنزل سوق اللحم .. قولوا عاد .. أطربونا .. قولوها بالنهاوند بالحجازي بالبقالي بالنعيمي.. قولوا خلنا نروح نزوره ونشكره .. ويمكن نطلع من عنده بقطعة ستيك شكبرها نتفطر عليها أول رمضان ...

لي متى يستمر مسلسل ما بنقول عن إسم المورد ولا إسم المطعم ولا إسم البرادة ولا إسم شركة الماي اللي تخلط الماي بالكيماويات والقاذورات .. من شنو خايفين وليش تخشون .. ؟؟ من حق الناس تعرف .. مب إحنا السبب .. إحنا الضحية .. ومن حقنا نعرف .. ومنها التاجر يحسب حساب إنه بينفضح وإن تجارتة بتتأثر فيحاسب .. وياخذ صحتنا جد .. والله حالتكم حالة ...

أما بالنسبة للحمة الوطنية اللي طلعت مضروبة ومريضة ومسمومة .. ما نبيها .. حتى لوقعدنا نطق فيها لهريس رمضان .. ما نبيها .. وبتم مريضة .. والسم تارسها .. وهدكم من هالسوالف ... أقول .. ما جني ضيعت ... مممممممممم ... مادري ... يلا .. اللحمة فاسدة وخلاص ... وجذي وهلون ....

هيلاري –

الولية هيلاري راحت القاهرة .. وقبل ما توصل بعض الجماعات المحسوبة على الصهاينه في الكونغرس طالبوا بمشروع قرار يوقف المساعدات لمصر .. والمصريين طبعا ما يعجبهم الحال المايل .. ولاحد يضغط عليهم بعد ثورتهم .. قاموا فلعوها "بالأوطة" .. يعني الطماط .. وبعدين بالبيض .. بس بيض بلدي مب مزارع .. وعبال ما وصلت السفارة وكانت يوعانة سوت صحن شكشوكة تتسلى عليه ..

بس المصريين ما يبون يمتنونها .. ويرجعوها حق زوجها مربربة .. وهم يعرفونه .. يحب المربربات ... فا ذكروها بضرتها .. وقعدوا يهتفون بإسمها مونيكا .. مونيكا .. وهم يهتفون وهي تقلي البيض في السيارة الجيمس السودا .. تعالوا .. ليكون كانت يوكان ..!!؟؟ ما دري .. المهم .. المصريين ذكروها بالذي مضي .. وأفعال زوجها وبلاويه .. يا ترى .. شنو يوجع أكثر .. البيض ولا مونيكا ..!!؟؟

مدام X   وعلاقة المرأة والرجل –

مدام X  عايفة سياسة وبلاويها وقررت تتكلم عن العلاقة بين الرجل والمرأة من منظور المرأة بحكم إن لها خبرة أنثوية في الموضوع .. الله يستر..

علاقه الرجل بالمراه .... علاقه تجمع كل المتناقضات في  هالعالم ... فهي مريحه جدا ولكنها متعبه كذلك ... واااضحه ويكتنفها الغموض في ذات الوقت ... سهله جدا وصعبه جدا ... مهمه ونحلف ونقسم انها اهم شي وتافهه وهامشيه ان مممكن ننهيها في لحظه .... علاقه تحتاج الصراحه ولكنها لاتستغني عن اللف والدوران من وقت لاخر ... تجمع الهدوء والصخب ... النظام والفوضى ... الحب والكره ... الخير والشر ... وفيها تتعرض المراه للنقد ولكن بقدر يفوق مايتعرض له الرجل ... هذا ان تعرض للنقد من الاساس ... وتتهم ((بضم التاء الاولى وفتح الثانيه )) بانها متسلطه غير مفهومه غامضه نكديه .. تضّيع الرجل في تفاصيل تافهه وتطالبه بامور بايخه ...

بنحاول نسلط الضوء على بعض هالامور اللي يرونها بايخه مع ان هي مهمه جدا ...

ماذا تريد المراه من الرجل .. ؟؟؟ مطلب المرأه الاول والاخير والوحيد هو الاهتمام ... الاهتمام العاطفي والاجتماعي والمادي وكل شي ... صعبه يعني هذي ؟ لا لا علموني بليز صعبه ؟ ها صعبه يعني ؟ .... مثلا مثلا

المراه تحب ان الرجل ان قام الصبح وهو مومعاها يرسل لها او يتصل لمجرد يقول لها صباح الخير ... ويومي مايبتدي من غير صوتك ... قعد من نومه مالقاها في الحجره يناديها ولما يشوفها يقول الحين الواحد يبتدي يومه بروقان ... راح الدوام عقب ساعتين يرسل مسج او يتصل ... لا لشي الا ليقول لها وبحبك وحشتيني ولو انك مطلعه عيني بحبك موت ... صعبه هذي؟

Steve wonder المغنى الامريكي المعروف له اغنيه تكاد تكون اشهر اغنياته على الاطلاق وتلخص لكم السالفه يقول فيها ,,,,  I just called to say I love you

And I mean it from the bottom of my heart

لما المراه ترسل مسج او تلفون او بيبي .... ماتنتهي السالفه بضغط زر الارسال  ... لا ابدا ....  انسى ... فهي تراجع البيبي وتقول وصل له  D ليش ماقراه كل هالفتره ... اها قرراه وطلع حرف R  ليش مارد ...؟ تشيك المسج وصل لها ريبورت وصول او واتس اب تتاكد ان قراه ... ليش ما رد ؟ ها ليش مارد ؟ ليش ليش ليش لييييييييييييييش ...

هي ماتفهم وماتستوعب سالفه (( انشغلت حدي )) ((مافضيت طول اليوم)) ... لانها تكون مشغوله في طبخ وعيال وكلام في التلفون وهذره الجارات وبرنامج التلفزيون او تكون في دوام ولويه ومراجعين ومع ذلك تقدر تركز دقيقتين ترسل له مسج ... وتقدر تتفنن في الكلام اذا حبت .... فبالتالي تفكر ان لو حتى مشاغل الدنيا فوق راسه يقدر يبوق له دقيقتين يرد على المسج او يرسل شي من نفسه دليل اهتمام وشوق او يتصل على السريع يشوف اخر الاخبار ويتطمن ان الامن مستتب .. فلما يرجع البيت بتكون تنتظره على نار عشان تقول له شنو صار وشنو سوت وكل التفاصيل اللي مايبي يسمعها ولا له مزاج يتناقش فيها ... فلو ماتكلم وطنش او سوى روحه منتبه وايه واها وشلون وياسلام ... وهو خبر خير شوي ويدخل في شبه غيبوبه بيكون جنى على نفسه

لان المراه حزتها بتم تفكر ... شدعوه ماعنده وقت يرد على مسجي ولا يتصل...؟

لايكون حطوه  وزير الداخليه ؟ مسوي نفسه مهم وانا ادري ماعنده سالفه ولاشغله ... وبعد راد البيت سرحان وهيمان ومومركز في كلامي ولابعارف يقول كلمتين على بعض !!!!!!  وتبتدي سياسه الاحتمالات ... الافتراضات خصوصا مع تكرار هالسالفه ... عاد الله يعين الرجل على افتراضات المراه تقط نظريه المؤامره باجزائها على صوب ... عزيزي الرجل ماتبي تتكلم ؟ ماتبي تتواصل ؟ ماتبي ترسل مسج ؟ ماتبي تداري وتدادي وتحتوي ؟ ماتبي تسولف وتاخذ وتعطي ؟ اوكي لامشكله بس تحمل اللي بيجيك ... اللهم هل بلغت اللهم فاشهد

واهديكم اغنيه العندليب  … مشغول وحياتك مشغول ولاخر الاسبوع مشغول 

DR. KNOW