مي والأربعين حرامي
... أففففف –
ما كنت أتمنى إني أتكلم في موضوع النواب
ومي .. ولكن ما أقدر أغفل عن تطورات الأوضاع اللي صارت يوم الأثنين و بعدين في
جلسة الثلاثاء.. يوم الأثنين قام الشيخ خليفة بزيارة تطيب خاطر للنواب .. ولكن
اللي ضايقني في الموضوع إنه 15 نائب إختاروا إنهم يقاطعون زيارته .. متعمدين ..
وبا قولها بصريح العبارة .. هذي قلة أدب ..
الشيخ خليفة والد الجميع .. ومحبته ومعزتة
وإحترامه غير قابلة للنقاش .. عيل إحنا شخلينا للخونة ..؟؟ مهما بلغت بينا
الخلافات .. والعادات العربية الأصيلة تحتم عليك إستقبال الضيف في بيتك... والبيت
ذي بيت الشعب ... ومن هذا الضيف .. بو علي .. وتقاطعونه ..؟؟ أفااااااا .. خلافكم
مع مي مب مع الشيخ .. والشيخ خليفة براسه ياكم .. إسمعوا منه .. إشتكوا له .. بس
اللي يقاطع بو علي ... أقاطعه ...
وثاني يوم تم التصويت .. 15 مع الإستجواب
و19 ضد .. الغريب إن بعض النواب اللي تزعموا الإستجواب .. ما صوتوا .. وكإن الأرض
إنشقت وبلعتهم .. ممكن تفهمونا ليش لو سمحتوا ..؟؟؟ إييييه .. يقولون السعيدي ياته
نوبة قلبية .. واعليه .. وحزة التصويت .. مسكين .. أجر وعافية ... ومسكين يطرش
مسجات .. تعالوا زوروني في عيادة القلب في العسكري .. زوروني كل سنة مرة .. لا
والمعاودة لازم يوديه العسكري .. إيه .. إيه .. ويزوره .. بيحصل أجر على الزيارة
.. معاودة المريض يا معاودة .. الشيوخ يوقفون مع بعضهم بعض .. وخاصة حزة التصويت
على شي ما يبون يصوتون عليه ... إيييييه ... ما علينا .. مب مهم ..
قعدت أقرا التويتات .. وشفت العجب العجاب
.. واحد يهني البحرين إن أغلبية المجلس صار مكون من النسوان .. واللي يهني المجلس
الأعلى للمرأة .. واحد سمى النواب نسوان
بس سحاقيات .. واحد يقول اللي صوتوا مع الإستجواب رجال .. واحد يستشهد بآيات
قرآنية عن الرجال اللي عاهدوا الله وصدقوا .. وكأنهم في جهاد .. بل بل ... وشنو أعيد وشنو أزيد .. صج قلة عقل .. وصج إنه
تشبث أعمى بالرأي .. وترى حماقة كبيرة .. وكبرتوا الموضوع .. وهو أصلا لا في موضوع
ولاشي ..
الوزيرة قالت لهم مب رياييل .. وإنتوا
عبالكم يعني إنها تقول عنهم نسوان ..!! وأنا الحقيقة إستغربت ... شلون وحدة تسب
واحد تقول له إنت مره .. يعني كأنه مسبه عودة .. يعني إهي تعترف إن المرة شي مب
زين ... في واحد وضح لي الموضوع .. وقال .. إهي مسبة إذا قلت عن مره ريال و عن
الريال مره ... اهاااا ... وضح عندي الموضوع ... بس مب مقتنع .. ورحت أدور في
التاريخ والتراث البحريني الخاص بالمسبات .. وتبين لي إن عكس كلمة ريال مب مره
أبدا ... طبعا لما تنقال لريال .. عكسها .. مممممم ... مممم ... برنثه ... رطبي ..
خفيف .. لين ... يعني بالعربي .. بناتي .. إييييه .. جذي وضحت الصورة .. أهاااا ..
فما يصير تهنون المجلس الأعلى للمرأة ..
ولا صار النواب نائبات ... ولا من هالحجي ذي كله ... بس كل الموضوع إنه قالت لهم
إنتوا من ربع علي سلمان ... بس .. يعني لو قالته أيام علاوي في المجلس جان إستانس
و تشقق .. على أي حال .. يا جماعة وسعوا صدركم .. كله ترى حجي فاضي .. وشوفوا حال
البلد .. ترى ما يسر إلا الصلوخ وأذنابهم وهدكم من الهذرة و الكلام الفاضي ...
وجذي
إلى دوار ألبا –
صارلي شهور وأنا وغيري يحذرون .. يا حكومة
.. مب جذي .. يا حكومة طبقي القانون .. ياحكومة ضربي بيد من حديد .. إنزين بيد من
حطب .. بيد من ... اي شي دخيل الله .. وقلنالكم .. ترى الناس هجت .. وملت .. وتبي
حل .. أريد حلا .. الناس صارت ما تأمن على حياتها .. وخايفة على أرواحها و أعراضها
.. ما يكفي إن أرزاقها متعطلة ..؟؟ لا تقولون ما تدرون .. ترى بازعل منكم يا حكومة
... إيه أبوي .. أرزاقنا متعطلة ... وحالتنا حالة ...
اللي صار كان ردة فعل طبيعية ... وخاصة بعد التفجير الإرهابي في العكر ...
عكر الله دنياهم وأخرتهم ... قولوا آمين .. الحين السؤال .. هل التجمع ذي بداية
شرارة ..؟؟ ولا هي هالمره وخلاص .. الجماعة نفسوا شوية عن روحهم .. ودشدشوا محل
تابع للقرمطي الممول .. وعلموا ذنب تيس أصول إستعمال هرن السيارة ... أنا كغيري ما
ودي إنه الوضع يتطور إلى مواجهات أهلية ... بس إذا إستمر النهج على ما هو عليه ...
الله يستر ..
الحكومة تحاول تمشي على حبل .. وقاعدة
تتمرجح .. وهاي ما راح يحل أي شي .. الحل على الأرض .. وبسيط .. ما يبيله كل هاللف
و الدوران .. في قانون .. في دستور ... في ميثاق .. طبقوه .. بس مب قايلين شي أكثر
.. وين المشكلة في تطبيق القانون ..؟؟ إذا في مشكلة عيل وقفوا العمل بالقانون على
الكل .. مب بس على القرامطة ... يعني معقولة اللي قتلوا زهرة تصير قضيتهم جنحة
..؟؟ معقولة ..؟؟ يعني عقوبتها مثل السرعة الزائدة.. معقولة.... ؟ وتبون السنة
تسكت .. ما راح تصير .. وإذا تبون أعدد لكم القضايا التي تم التحفظ عليها ما راح
أخلص ..
المشكلة إن الإرهابيين القرامطة صوتهم عالي
.. وعندهم ناس محميين .. من بابا سنفور .. لعلي سلمان .. لنبيل رجب و غيرهم ..
والسنة ساكتين طول هالمدة .. ومنتظرين الحكومة تتحرك وتحل الموضوع ... وإحنا
متكلين على الله ثم على الحكومة ... بخيرها وشرها .. وساكتين .. بس مافي سني ما
يسأل ... إنزين لمتى ..؟؟؟
إلى نبول رجب –
مسكين بلبول .. مستانس على عمره .. قال
علـى توتير ... وبكل ثقة ... رايح القاهرة .. يقول بيشوف أصدقاء ويسوي لقاءات تلفزيونية ..
ويجتمع من ناس من الأمم المتحدة ... خخخخخخ ... طب ده كلام ..؟؟ المصريين كان لهم
كلام تاني ... أحلى كلام .. من أجدع ناس .. قالوا له .. ما كانش يتعز يا روح ماما
.. إنت تاخد بعضك .. وتروح البتاعة اللي هناك دي .. إسمها أوضة المترحلين ..
وتورينا عرض كتافك .. وتيتي تيتي ... زي ما رحتي .. زي ما جيتي ... يلا يا بابا ما
تعطلناش .. ورانا شغل .. في ناس حلوة عايزين ندخلها بلدنا .. وإنت يا بتاع إيران
ما تشرفناش ... وبعدين مش تبقى تستحم .. جتك خيبة على ريحتك ..
مشكلة نبول .. راح القاهرة بجواز سفره
البحريني .. وقدم الجواز لموظف الجوازات .. وقالوا له لا أبوي مافي تدخل .. توهق
الريال .. مايقدر يقول إنزين عطوني الجواز الحمر .... وخذوا جوازي الأزرق الأمريكي
.. والحين ما بتدخلوني باتصل في سفارتي الأمريكية .. ما يقدر .. توهق ... بنت الخواجة يوم تروح راحت بالدنماركي .. ولما
ما دخلوها ... سفارة البقر والزبدة دخلتها ... بس هو خذ مقاس الطريج .. ورجع ..
بمناسبة الكلام عن الأمريكي والدنماركي ..
دائرة الهجرة والجوازات أعلنت إن اللي عنده جواز غير بحريني يروح الجوازات ويبلغ
... يا ترى نبول بلغ الدائرة إنه عنده جواز أمريكي .. لايقول ما عنده وقت .. أكا
عنده وقت يسافر ويروح ويي ويقعد في مطارات ويقابل أمم متحدة ومادري منو ..
ولاتقولون إنتوا ما تدرون عنه .. بس رد بالسلامة إخذوا جوازه وقولوله يراجع
الجوازات و ييب معاه جوازه الأمريكي .. بس .. العملية سهلة ..
بس إنتوا ما تبون تبردون قلوبنا .. ولاتبون
إطبقون القانون ولا هم يفرحون ... نشوف أخرتها ويا الحكومة..
إلى وزارة الداخلية –
أصدرت الداخلية بيانين في فترة ساعات ..
الأول تكلمنا عنه والمختص باللي معاهم جوازات غير بحرينية .. والثاني وايد عجبني
.. اللي عنده سلاح غير مرخص يراجع مكتب الترخيص في مبنى التحقيقات .. بس ما قالوا
ليش .. وما قالوا متى .. وما قالوا – وهذا الأهم – شبيسون مع الناس اللي معاها
سلاح غير مرخص .. بيعطوهم رخصة مثلا ..؟ غرامة .. ؟ بيسحبونه منهم ويقولون لهم
الله وياكم ..؟؟ أو يمكن يقدموهم للمحاكمة ..؟؟
ما يندرى .. ما قالوا ..
المجتمع البحريني وعلى عقود طويلة من الزمن
ما خزن سلاح في البيت .. وما كان يستهويه السلاح .. ولا شال سلاح ... الأحداث اللي
طافت علينا جعلت المواطن الشريف يخاف على حياته وعرضه وممتلكاته .. و شفنا الناس
تشتري أسلحة خوفا من الإعتداءات .. وفي المقابل شفنا تطور في الإعتداءات .. إنفجار
في العكر .. إنفجار في المعارض .. قنابل تم إكتشافها قبل ما تنفجر .. مولتوف في
الشوارع و على اللي له نصيب ...
سمعت عن بعض الشباب بركبون اللاند كروزر
ويدقون سلف يدورون الإرهابيين اللي يقطون المولوتوف .. وبيسونهم جزء من الأسفلت ..
لو صج هالكلام .. مب لازم يسجلون سياراتهم سلاح بعد ..؟؟ الإنفلات الأمني تتحمل
وزره الحكومة .. غياب الذيب سوت للخرفان هيبه .. ولا تلوموا الشعب و تحملوه ما لا
يطيق .. الأمن والأمان حق مشروع للمواطن .. ومن حق كل مواطن توفير الأمن لعائلته
في البيت وفي الشارع .. إذا عجزت الحكومة عن ذلك ..
تفجير العكر –
تفجير العكر إرهابي بكل معنى الكلمة ..
نقلة نوعية في الإرهاب القرمطي على مدى 14 شهر .. كثير من الدول والمنظمات
"أدانت" التفجير .. الشرطة السبعة اللي إنصابوا قاعدين يسألوني وين
يصرفون هالإدانات .. أو إنها بتداوي جراحهم بسرعة .. على أي حال .. كل اللي أدانوا
يشكرون .. وكانت إداناتهم قوية الحق يقال .. ما عدا ... البيت الأبيض .. اللي ربط
بينها وبين إستخدام المسيل .. ما عندهم سالفة ..
الإدانات فاجئت الوفاق .. ما توقعوها ..
دايما كانت الإدانات خفيفة تمر عليهم مرور الكرام .. بس هالمرة ..لا ... الوفاق
المتمسكة بالنهج السلمي يا زعم .. ما أدانت التفجير .. ولا حاولت تبعد نفسها عنه
.. ولا تقول إن اللي سواها فئة ضالة .. لا .. طلعوا بيان .. ويا كثر بياناتهم ..
يستنكرون حصار العكر .. وينفون صلة أهالي العكر بالتفجير .. يعني كأن القنبلة
حطوها ينانوه ..
هذا البيان .. في رأيي .. أوقح من التفجير
نفسه .. عودونا على فعل المنكرات وبعدين ينفون .. وينكرون .. بس هاي شغلهم ..
أولاد الشوارع أتباعهم يفجرون .. وهم ينكرون إنه أحد تابع لهم .. وأي أحد قرمطي
سوا هالشي .. وقاحة .. وقلة أدب ما بعدها .. متى بنشوف اليوم إللي قادة هالجمعية
الإرهابية يحاكمون ..؟؟ اللي تجرأ وقال إسحقووووه .. كبيرهم هذا ... متى بنشوفه
يتحمل وزر التحريض على قتل الشرطة وغير الشرطة ..؟؟ وسمعنا من المشير إن المدعو
نوره عليه قضايا .. متى بنسمع إنه تم إستدعائه للنيابة ..؟؟ يا حكومة .. والله
ملينا .. إففففففففف ... سووا شي عاد ... ترى مصختوها ..
أمس .. تطوروا في
إرهابهم .. وصل الإرهاب إلى شارع المعارض .. بدل ما كان الإرهاب ضد العسكريين ورجال
الأمن .. وصل إلى المدنيين من مواطنين و سياح ومقيمين .. قنبلة .. ما تفرق بين ذي
وذي .. الله سترنا أمس .. المره اليايه .. يا عالم ..
شمبانيا –
كان في خبر صغير في أخبار الخليج من جم يوم
.. يقول .. واحد خليجي .. شرب وهو وأقرب المقربين غرشة شمبانيا في أحد ملاهي دبي
... قيمتها 137 ألف دولار .. إيه نعم .. مكتوبة صح .. بالبحريني .. حوالي 52 ألف
دينار ... مب السهرة .. لا .. بس سعر الغرشة .. خخخخحخ .. أنا شفت الرقم وسكرت .. مافي داعي أشربها بعد ... والحمدلله .. أنا
مأشرب كحول .. بس حشيش ..
هالقد وصل التبذير فينا ..؟؟ الإنسان بيشرب
خمر ..كيفه .. حسابه عند ربه .. بس إذا ما يحس إنه له إخوان تموت من الجوع في
سوريا .. وإخوان له في غزة نسوا شنو الكهربا .. وما يذوقون الخبز إلا مرة أو مرتين
في الأسبوع .. والأخو ذي يقوم ويبذر هالمبلغ ولا يفتكر على زجاجة منكر .. والله لو
أنا لاقي الفلوس في الشارع ما بذرتها جذي .. ولوكان عندي أضعافها مضاعفة ...
وقبل أسبوعين .. تباهى عبدالله بوالخير مادري
بالخير إنه صرف مليون دولار على التصويت لمغنية في برنامج تلفزيزني ساقط ... وواحد
إمارتي صرف حوالي مليون درهم على التصويت لمغنية ثانية .. وأحلام فستانها فوق 1.3
مليون درهم ... شصاير في الدنيا ..؟؟؟ ليش هالتبذير والإسراف اللي ما يقره شرع ولا
عقل ولا دين ..
اللهم لا تأخذنا بما فعله ويفعله السفهاء
منا يا رب العالمين ..
أمنيات ضائعة –
كم
تمنيت لقاء علمته مستحيــــلا ....
كم تمنيت نظرة ما كان لي إليها سبيــــلا
...
كم تمنيت لمسة من يديك تكون لي في الظلمات
هــدى ودليــلا ..
كم تمنيت أن أخبىء أماني في شعرك الطويــلا
...
ولكن
..... ما كنا لنكــــون
كم تمنيت أن تكوني نوري إن ضاع القمر ومات
القنديـــلا ...
كم تمنيت أن أتنفس من هواك
العليـــــــــــلا ...
كم تمنيت أن أهيم في شفتيك وأقبلك
تقبيــــلا ...
كم تمنيت أن أتغنى بإسمك فأطرب
وأعيــــــــــدا ...
ولكن
.... ما كنا لنكــــــــــــون
لاح بالإفق نجم الرحيل ساطع لكــن
ذليــــلا ...
فأذني يا عين بالدمع وأعيدي الدمع
سليــــــــــلا ...
ما نمت يا عين في هواها فما أنت فاعلة في
الفراق العصيبــا ..
شئت البعد لإنسى حبها, فما زادني البعد إلا
حبا للحبيبــا ..
فنحن
... ما كنا لنكـــــــــون
أمامك الحياة واسعة فلك مني أحلى الأماني
السعيـــدا ...
لا تحزني ولا تجزعي , فسيأتيك حبا جديدا
مثيـــلا...
وإن ذكرتيني , فإبتسمي لذكرى أيام الحب
الجميــــــــلا ...
وسنبقى قصة وقصيدة حب تغنى لكل العاشقينــــا...
فنحن
.... ما كنا لنكـــــــون
ما كنا وهما ولا سرابا عديما ...
ولكن حكم الزمان والقدرالأليما ...
ولو خيروني مإخترت غيرك خليـــــلا ...
وما رضيت لك في هوايا بديـــــــــــلا ...
فنحن
... كنـــا ... وكنــــــا ....... وكنــــــــــــــا
DR. KNOW
مساء الخير
ردحذفلاتعليق على موقف النواب ، كل اللي في الخاطر كتبته،بس أعتقد إن حاسة السمع عندهم مفقودة. الله يعينا في زمن مانعرف نهايته وإلا أقول لك النتائج معروفة إذا ظلت أوضاعنا على ما هي عليه،اكتب يمكن من كثر الكتابة شوية يتحركون قبل ضياع الفرصة. الله يعينا