رسائل خاصة بس بدون زعل 47

مي ماما والأربعين حرامي –

ما عرفت الوزيرة مي الخليفة وزيرة الثقافة إنها لما وقفت جدام باب مجلس النواب وقالت إفتح يا سمسم بإنها راح تفتح صندوق بندورا.. ويطلع من الصندوق بلاوي كلنا كنا في غنى عنها .. اللي كان عنده شك إن الصف السني (مشقوق) .. اليوم تأكد .. بدل ما نوحد الصف ونعرف إن عدونا في المرصاد وموحد برغم ما عندهم من إختلافات .. أما إحنا ... خبر خير ..

اللي صار في المجلس يوم الثلاثاء ... مخجل .. من الصوبين ... ومرفوض .. من الصوبين .. والغلط .. على الصوبين .. يمكن إنت عزيزي أخذت موقف مع مي أو مع النواب وهذا رأيك .. ويحق لك .. أنا أخذت موقف .. لا مع ولا ضد طرف دون الأخر .. الأثنين على خطأ ... أنا أخذت موقف مع البحرين وضد شق الصف السني ..

مب من أولوياتنا أن نختلف على ربيع الثقافة .. يمكن أنا أو غيري ما يتفق معاه .. ويجوفه مخالف للشرع .. بس غيرك يحب يجوف هوليو و أندريا .. إنت ما تجوفه ثقافي .. غيرك يجوف إن الأوبرا و الأغاني الراقية ثقافة ... عدم فرض رايك على الغير بحد ذاتها ثقافة .. وين إحنا منها ..؟؟

أنا يا إخوان ولله الحمد .. أصلي .. وأصوم .. وأتصدق .. وحجيت ..وغيره من أمور ديني ومطالب الشرع .. ولكني في نفس الوقت أحب أسمع أم كلثوم .. وعبدالوهاب .. وأندريا بوتشيلي .. وأعتبره غذاء روحي .. وأحب أشاهد المعارض الفنية .. وأحب أقرأ الكتب في شتى المجالات .. ونحن ولله الحمد نعيش في بلد مفتوح .. يحق لك فيه الخيار .. ما حد له الحق إنه يحكم علي .. ولا أحد له الحق إنه يزايد علي في الدين .. ونحن لا نعيش ولن نعيش تحت سلطة طالبان ..

إحنا إنتفضنا لإن مليشيات الوفاق سدت علينا الشوارع .. ونرفض إن السنة يسوون نفس الشي .. على إخوانهم السنة والمقيمين .. مب من طباعنا .. وليش ..؟؟ علشان الناس ما تروح تسمع موسيقى ..؟؟ أكا البارات تارسة الديرة .. ليش ما توقفون جدام البارات وتمنعون الدخول ...؟؟ الدعارة في شارع المعارض حدث ولاحرج .. يلا .. وقفوا لهم .. بس إنتوا ما سويتوها .. لإنكم تبون تمنعون الدعارة والبارات .. ولكن تبون تمنعوها بالقانون .. وهاي الصح..

كم بار ومرقص في مسافة 300 متر من مسجد أبو بكر ..؟؟ مادري .. بس أتوقع حوالي 20 .. ومع ذلك .. الناس ما شاءالله تارسة الخطوط في كل صلاة .. اللي يبي البار يروح .. وذنبه على جنبه .. واللي يبي الصلاة يروح .. وأجره على جنبه .. هذه هي البحرين .. طول عمرها .. وجذي ربينا .. على حرية الإختيار .. وبعدين ومن باب أولى .. إن أحد النواب .. واحد منكم وفيكم عنده فنادق وفيها خمور وفيها دعارة ..!! إنزين .. كلموه .. إنصحوه .. عنفوه ييييياه .. أقولكم .. قاطعوا كل الجلسات إلى أن يرتجع ..!

النواب اللي كانوا أسود على الوزيرة كان أولى لهم أنهم يكشروا عن أنيابهم لفساد بابكو - ياويلي .. وألبا – يا ديلي يا ديلي - .. والفساد المذكور في التقرير المالي و طيران حلق حوش و غيره وغيره .. المواطن يبي يعرف .. شنو سويتوا له ..؟؟ يا نواب .. قبل ما تفرضون تطبيق الشريعة لتحسين وضع المواطن للآخرة ... حسنوا وضع المواطن للدنيا .. ! بس يعني مشاكلنا كلها مختزله في عرض موسيقي أو مسرحي .. يا أخي , يخدش حيائك لا تروح .. يا أخي القنوات اللبنانية وروتانا والرقص والمساخر ما تريحك .. لا تفر عليها .. إبتعد .. الله يهديكم أولوياتكم متخربطة .. وعبالكم بس الكلام في الدين هو اللي بينجيكم في الإنتخابات القادمة .. !

وتعالوا هني ... والله إنكم باطين جبدي .. ليش ما تستقون إلا على النسوان ..؟؟ مي وفاطمة البلوشي .. كنتوا رؤوفين رحومين مع ميرزا .. اللي الفساد عنده واصل ليه هني .. بالعكس .. كانت ناركم عليه بردا وسلاما ..!! عجييييب والله .. ومجيد العلوي ... أكبر مفسد في تاريخ البحرين .. عفس الديرة .. والعمل .. وغرس الطائفية .. شنو ما كانت لكم أنياب أيامها ..؟؟ إنزين أسنان تعض ولو على خفيف .. أبد .. ما صار .. والبحارنة .. ومنصور بن رجب الحرامي العود غاسل الأموال ... تاجر المخدرات والأسلحة .. ما سمعنا لكم صوت الله يحفظكم لكراسيكم ..

هدكم .. خل عنكم كل ذي .. وينكم عن الوفاق وبلاوي الوفاق .. وإنتوا أول من يعرف إن البلد ما فيها أمن وأمان ... وينكم .. شنو سويتوا .. وين القوانين .. وين مشاريع القوانين .. اللي تلزم الحكومة بفرض الأمن والأمان .. إنزين .. سؤال حضرات النواب .. متى أخر مره واحد ريال ملو هدوموه تقدم بطلب إستجواب لوزير الداخلية ..!!؟؟ أقول لكم .. ماحصلت .. لإنكم مب كفو .. وإنتوا عارفين هالكلام .. بس على فاطمة ومي طلعت أنياب ومخالب ماشالله عليكم ...

وأنا باقول لكم الصج .. إنتوا إستفزيتوا مي .. كل ما سوت فعالية طرشتوا صبيانكم يخربون عليها ..؟؟ ليش ..؟؟ مشكلة الآذان .. ؟ كان من المفروض راحوا لها ناس من عندكم عقلاء .. وفهموها إن هذا شي غير مقبول إذا صار مرة ثانية .. وإنهوا الموضوع .. بدل التجييش اللي حصل .. ما يصير تصادر حقي في التمتع بالفعاليات .. ما أسمحلك .. مافي أحد عنده تفويض إلهي .. ولا أحد له الحق إنه يسويلنا إبتزاز ديني .. هاي اللي يسويه بابا سنفور ..  إلا إذا بتسوون لنا جمعية الأمر بالمعروف بعد هاي شي ثاني ..

كلمة أخيرة للنواب – دام إنتوا صج خايفين على البلد وعلى وقف الدعارة في البلد ... شنو سويتوا عشان تبندون خيمة نمرة 6 ... !!؟؟؟ تراها مب بس أيام الدوار .. لا أحبتي ... دار الهوى دار .. !

وأنا أكتب الحين .. الساعة 4 العصر يوم الأربعاء العصر .. أحد أقاربي في سيارة رايح السلمانية بحالة طارئة .. والشارع مبند بسبب حرق تايرات وزحمة سيارات بعد .. والله عيب يا نواب .. على الأقل ربيع الثقافة ما بند شوارع ولا أرهب ناس ... صيروا رياييل ... أعطونا أمن الأول .. وبعدين تعالوا نتكلم في الأغاني ... مالت عليكم ....

وأما سعادة الوزيرة .. فقد أخطاءت .. سوت بوبو عود ( يعني خطأ كبير ) .. ما عرفت شلون تتعامل مع النواب .. مب من هالجلسة .. لا .. من قبل .. للأسف هي عندها غطرسة وديكتاتورية .. وما تسمع لإحد .. غير بعض اللبنانيين ...  أو ربما تعيش على أطلال الماضي و ما وصلها ثقافة التغيير للحين .. سعادة الوزيرة إستعدت (يعني سوت منهم أعداء) كل من إنتقد أسلوبها في العمل .. من أيام وزارة الإعلام .. وحتى قبلها من أيام المتحف ...

هذه الأيام راحت .. وولت .. الحين الوضع على الأرض تغير يا سعادة الوزيرة .. والحين في أخذ ورد .. الوزير أصبح خادم للشعب .. ومب العكس .. الوزير صار لزاما عليه يتعلم ينحني وإلا إنكسر .. الوزير صار لازم يتعلم فن السياسة وشلون يتعامل مع النواب والصحافة والشعب .. ومن باب أولى من وزيرة ثقافة إنها تنتقي ألفاظها مهما سمعت .. وعليها أن تبقى (كوول) تحت الضعط .. إستخدام كلمة (مرتزقة) لتصف النواب ترى عوده .. وتطعن في رجولتهم .. أكبر .. والنواب الإسلاميين – اللهم لا حسد -  كل واحد عنده مرة وثنتين و3 .. ويدور عالرابعة... كلامها غير مقبول .. وفقط للتوضيح .. أنا من المعجبين بالوزيرة على إختلافي معها .. وأحب اللي سوتها في الربيع الثقافي .. و الفنانيين اللي يابتهم البحرين وترسوا الكراسي .. وأشكرها وأتمنى أشوف عروض أكثر ..

يا شماتة مليشيات الوفاق فينا .. يا شماتة بابا سنفور فينا .. يا شماتة "الوسخ" فينا ..  عورتوا قلوبنا .. واقول .. رجعوا إلى صوابكم .. ويا سعادة النواب .. من كان منكم بلا خطيئة .. فليرجمها بحجر .. ويا سعادة الوزيرة .. تستطيعي صيد ذبان أكثر بالعسل من ... أه ..مممم .. ما بيكون وايد ثقافي إذا قلت التكملة .. !!

إنتخابات الوفاق –

الوفاق سوت إنتخاباتها .. سوتها في مطعم مرمريز .. المطعم اللي فيه تكة طهران .. صوت وإكل تكة .. يعني كإنهم يبون التصويت يكون في مكان مرتبط بإيران .. ما يقدرون .. لازم يكونون يم أسيادهم .. وصارت الإنتخابات .. إنزين .. خير يا طير .. مليشيا الوفاق اللي تدعي إنها تتكلم بإسم الشعب .. كامل الشعب .. سنته و شيعته .. واللي تتدعي إن جمهورها يمثل 67% من شعب البحرين .. وإنها أكبر جمعية سياسية مب في البحرين بس ... لا .. في كل الخليج "الفارسي" مثل ما قال واحد من قادتها .. مليشيا الوفاق جمعت 1700 صوت في إنتخاباتها .. !!

شي يضحك .. 1700 صوت .. اللي طلعوا وصوتوا لإعضاء شورتها .. يعني شي مهم .. هاي مثل البرلمان الشيعي .. البرلمان الثالث بعد مجلس النواب والشورى .. بس هالعدد يطلع ويصوت ..؟؟ وين يا وفاق ربعكم ..؟؟ في هالمرحلة المهمة ذي اللي لازم تبينون للحكومة ولنا وللسفارات اللي إنتوا رايحين يايين عليهم إن لكم قوة في الشارع تساندكم .. طلعوا وطلعتوا فشوش .. قولة عادل إمام .. ده إنت طلعت أي كلام يا جدع ...

وأعتقد إنه هاي يثبت شي .. الوفاق مالها أي قوة شيعية .. هي تستمد قوتها من بابا سنفور بصفته الولي على البحرين وتوابعها .. المعين من الولي السفيه الأكتع .. لو الوفاق هي اللي دعت للمسيرة المليونية مالت شارع البديع واللي طلع فيها على أقل تقدير 20 مليون راس ... لو الوفاق هي اللي دعت لها .. ما كان حضرها غير جم مئة نفر .. ولكن بابا سنفور أصدر فتوى فرامانية ملزمة .. فيها جنة وفيها نار .. وأوجد لها الوجوب الشرعي .. أي وجوب شرعي ..!!؟  قال لهم إنها أوامر ربانية .. ومن عصاني فقد عصى الله ...  يعني شبقى .. لازم الكل يحضر ..  لما ما خوفهم بفتوى عشان الإنتخابات ... محد من ال 20 مليون راح ... غير 1700 .. ويمكن أغلبهم كانوا رايحين ياخذون التكة تيك أواي وجافوا تصويت ..

المكان مرمريز صاير في وسط المنامة .. في منطقة سنابس .. وفيه 200 ألف شيعي على الأقل في مسافة تقل عن 10 دقايق بالسيارة .. ومع ذلك فقط هم ذيلة اللي صوتوا .. خلكم من ذيله .. عندكم حوالي 50 ألف في منطقة سنابس وكرباباد وكرانه وأبو قوة  .. يعني في نفس المنطقة ... ومحد راح .. وين قوتكم ...؟؟؟ وين قاعدتكم .. أي جمعية مهنية .. مثل الأطباء والمحامين .. عدد المصوتين فيها يتجاوز هذا الرقم ..

تعرفون شقد نسبة اللي صوتوا مع عدد سكان البحرين ..؟؟ حوالي 0.25% .. يعني ما حصلوا 1% .. ولا نص في المية !! وللحين أولاد الكلاب يتكلمون بإسم كامل الشعب ..

إلى جواد و"الوسخ" –

هذا الأسبوع أسبوع جواد .. إبتدأ بحملة لدعم محلاته .. ومعاها بالتزامن حملة يومية  في "الوسخ" مدججة بعشرات الصور عن الهجمات اللي تعرضت لها محلات جواد .. لو تقدر "الوسخ" كان حطت صور المقاطعة ... بس شلون يصورون ناس غير موجودة ..؟؟؟ وبما إن جواد و"الوسخ" مهتمين بنشر عشرات الصور ... أقترح إنه إحنا المقاطعين نرسل لهم صورنا 2x2 بخلفية بيضا مكتوب عليها "لا لجواد" .. وخلهم ينشرون صور للبلطجة الصامتة ..

أنا ما أؤيد التهجم على محلات الخائن جوادو .. هذي أطباع المليشيات الشيعية و مب إحنا .. ولكن اللي يهمني في الموضوع إن "الوسخ" تنظر للموضوع بنظارة فلترية .. تفلتر جرائم المليشيات اللي مالها حصر .. وكإنهم ما يسمعون ولايشوفون ولايحسون .. لو أحد الوسخين في "الوسخ" طلع راسه من دريشته على شارع البديع لشاف "ما يندى له الجبين" .. ولكن مهمتهم محصورة فقط في إظهار "بلطجة الحكومة" .. وتشويه صورة الحكومة .. وبس ..

"الوسخ" ما تذكر ألآلاف المولتوفات اللي يقطونها الإرهابيين كل يوم على الشرطة والمدنيين .. وأبد ما تشوف التواير تسد الشوارع .. ولا السلندرات .. ولا الكتابات اللي تزين شارع البديع .. بس بقدرة قادر مافي ولا شخط واحد على طوفتهم .. ولا كإن مقر الجريدة في وسط الشارع ..

الحملة المنظمة لجواد بتنقلب ضده .. وبتزيد في تصميمنا على مقاطعة محلاته أكثر من قبل وأبدي .. جواد ما قاعد يفكر بعقلية تجارية .. يعني محل الريم في الرفاع يقرش صارله أكثر من سنة ... ويخسر .. بس هو ما يبي يبنده لإثبات وجود .. وجود سياسي ... بس إحنا وراك والزمن طويل يا جواد .. لإن إحنا بعد .. مقاطعتنا سياسية ..

جلسة النواب –

مثل ما الكل يعرف إنه عندنه 40 نائب عازة .. في جلسة إستجواب مي ... 10 ما حضروا .. يعني ربع المجلس غايب ..!! السؤال .. ليش ..؟؟ هل الحضور إختياري ... ؟ هم عندهم 4 جلسات كل شهر .. يعني الغياب عن جلسة وحده يعتبر إنه غاب عن ربع الجلسات ..وبما إن النائب يتقاضي حوالي 4000 دينار شهري .. يعني كل جلسة ب 1000 دينار ... يعني .. يا إما في عذر مقبول من مرض أو سفر .. يا إما يخصم عليهم المبلغ .. وأنا متأكد تماما إنهم بيطلبون من المحاسبين خصم المبلغ لإن يخافون على المال العام ... عيل شلون ... وحتى لو كان عليهم .. ما عندهم يما إرحميني .. نعم ... نوابنا .. اللي يكافحون الفساد ما يرضون إلا المال الحلال لهم .. والله كفو يا نواب ..

 

بس الملاحظ إن كلهم محسوبين على الحكومة .. والحكومة ساعدتهم في الوصول إلى المجلس بطريقة أو بإخرى .. وكلهم بلا إستثناء ما وقعوا على ورقة إقالة الوزيرة .. في شي .. في .. وجذي

Angelitos Negros

بمناسبة ربيع الثقافة ... وبمناسبة اللي صار في مجلس النواب .. حبيت أشارككم بإغنية أحبها وايد .. غنوها ناس كثير .. بس أنا شخصيا أحبها من روبيرتا فلاك Roberta Flack .. وهي أمريكية ولكن الأغنية بالأسبانية ومعناها "الملاك الأسود" ... إنزين .. أغلبكم ما يعرفون الأسبانية .. ولكنكم راح تحسون بموسيقى جميلة وصوت دافيء, وقوي وحنون وقمة في التعبير ..

الأغنية عن رجل أسود بحار .. في إحدى زياراته لإحد الموانىء يضاجع وحده بيضاء .. ويمشي هو .. وتحمل المرة .. وتخلف ولد أقرب إنه يكون أبيض منه أسود .. يكبر الولد .. ويتزوج بنت بيضاء .. وكانوا في قمة السعادة .. وحملت المرة .. وخلفت ولد .. بس طلع لجده .. أسود .. لما شافته اسود قتلته .. فلما زوجها شاف اللي سوته ... قتلها .. وخذوه الشرطة .. وفي السجن .. كتب القصيدة .. ويخاطب فيها الرسامين اللي يرسمون الملائكة في الكنائس .. ويسألهم ليش الملائكة اللي ترسمونها بيضاء .. المرة القادمة لما ترسمون ملائكة إجعلوها سوداء ..لإن الله يحب الجميع ولا ينظر إلى اللون ..

الأغنية عن المساواة بين البشر .. فلا أحد يكتب لي يقولي كنائس وخرابيط ..  Angelitos Negros

واللي يحب يشوف أغنية ثانية لروبيرتا فلاك .. أقترح أغنية TheFirst Time I ever saw your Face   من أجمل الأغاني العاطفية ... وفازت بإفضل أغنية سنة 73 ..

بالله عليكم .. وين بتحصلون هالتنوع الثقافي غير هني ..!!؟؟

إن كنتي تحبيني –

 
إلى أجمل من رأت عيناي ........

إن كنتي كما تقولين تحبيني ...

أعطيني النور من عينيك ..

وأتركيني أنام في ظلال شعرك ..

وأختبىء بين تلال نهديك ..

وأمسح على خاصرتك جبيني ..

إن كنتي تحبيني ..

دعيني أعيش عذب الحب ..

ومر الحب ..

وحب الحب ..

وأعيش الحب كله في ليلة تهنيني ..

إن كنتي تحبيني ..

فإدعيني أنعم بسماحة وجهك ..

وبعبق إبتسامة القمر على شفتيك ..

وبنور الشمس تشع من خديك ..

وبلألىء تسبح في بحر عينيك ...

إن كنتي تحبيني ..

أخرجي من خلف الأبواب ..

نعدوا تحت مطر السماء ..

نهجر الزمان ..

نضيع المكان ..

ونملأ بالفرح حنيني ..

إن كنتي تحبيني ..

هاتي يديك وإنطلفي معي..

إلى حيث الأبعاد ..

تبدأ بك ..

وتنتهي بي ..

إن كنتي تحبيني ..

تعالي إلى حيث الحب الأزلي يحيا ..

في كهوف نبنيها ..

ونسقي الأنهار ماء من ينبوع حنيني ..

ونبعث للأزهار رحيق الحب الدفينِ ..

إن كنتي تحبيني ..

تعالي نطير إلى حيث المجهول يجلى ..

ويغادر الألم والحب يبقى ..

في غابات زرعناها اليوم تحيا ..

ورويناها بماء الحب تزدهر بكروان وتغريد ..

إن كنتي تحبيني ..

أدعوك لإن تأثري لكل حب مات ..

ولكل فؤاد حزين تاه ..

ولكل معذبة ومعذب على الأحزان بات ..

وأدعوكِ لقلبي لتحصدي الأمن والأماني ..

فأنتي بلا شك ............ تحبيني

DR. KNOW